მთის პიტნა (Calamintha Grandiflora (L) Moench) – ტუჩოსანთა ოჯახის წარმომადგენელია. აჭარაში მოიხსენიება როგორც კაპლიბალახა და ნანეოთი.
მთის პიტნის ვარდისფერი ყვავილი ორტუჩიანია და ფოთლების იღლიებში 3-7 ყვავილიან შეჯგუფულ ნახევარქოლგებადაა განლაგებული.
ღეროზე ერთიმეორის პირდაპირ განლაგებული საკმაოდ გრძელყუნწიანი ფოთლები კვერცხისებრია, კიდეებზე ხერხისებრი მსხვილი კბილებით. თეთრი ბეწვით მოფენილი ღეროს სიმაღლე 20-30 სმ ფარგლებში მერყეობს.
ყვავის ივლის-სექტემბერში. შუა და ზედა სარტყლის ტყიან მთებში, გავრცელებულია აღმოსავლეთ და დასავლეთ საქართველოს ტენიან წიფლნარებში, წიფლნარ-ნაძვნარებსა და ნაძვნარ-სოჭნარებში.
ვარდისფერ-წითელი განიერტუჩიანი და გრძელმილიანი ყვავილების, აგრეთვე მოხდენილი ჰაბიტუსის წყალობით მთის პიტნა მაღალი დეკორაციული ეფექტის მქონე მცენარეა.
ხალხური მედიცინა მის ფოთლებს იყენებს კუჭის აშლილობის და მომნელებელ სისტემაში გაზების დაგროვების წინააღმდეგ, აწყნარებს შეტევით ხასიათის ტკივილებს;
გამოიყენება როგორც მაღალხარისხოვანი საკაზმ-სანელებელი მცენარე. მართალია დიდი ღალიანობით არ გამოირჩევა, მაგრამ ფუტკარი მისგან მცირე ნექტარს მაინც იღებს.
სასიამოვნო სუნისა და გემოს გამო ჩაის ნაცვლად იყენებენ.
ავტორები: შ.ხიდაშელი; ვ.პაპუნიძე.
*მცენარეები სამკურნალო გამოიყენეთ მხოლოდ ექიმის რეკომენდაციის გათვალისწინებით.
იხილეთ აგრეთვე: ბაღის პიტნა – დარგვა, მოვლა-მოყვანა, გამოყენება
