თურქეთი უახლოეს თვეებში აშშ-ში 15 ათას ტონა კვერცხს გააგზავნის. შეერთებულ შტატებში, ფრინველის გრიპის გავრცელების გამო, ბაზარზე ქათმის კვერცხის ნაკლებობაა.
თურქეთმა ქათმის კვერცხის ექსპორტი დაიწყო „15,000 ტონა კვერცხი გაიგზავნება, რაც 700 კონტეინერის ექვივალენტი იქნება“, განუცხადა „როიტერს“ თურქეთის კვერცხის მწარმოებელთა ცენტრალური კავშირის თავმჯდომარემ იბრაჰიმ აფიონმა: „ექსპორტი განხორციელდება ჩვენი კავშირის წევრებისა და საჭირო ნებართვების მქონე კომპანიების მეშვეობით.
მიწოდება დაიწყო ამ თვეში და გაგრძელდება ივლისამდე, დასძინა მან.
თურქულ-ამერიკული გარიგება, სავარაუდოდ, 26 მილიონი აშშ დოლარის საექსპორტო შემოსავალს გამოიმუშავებს.
ფრინველის გრიპი
შეერთებული შტატები ამჟამად ებრძვის H5N1 ფრინველის გრიპის გავრცელებას.
ვინაიდან ფერმერები ანადგურებენ ქათმებს დაავადების გავრცელების შეზღუდვის მიზნით, სუპერმარკეტები კვერცხის დეფიციტს განიცდიან და ფასები მკვეთრად გაიზარდა – 65%-ით 2024 წელს და კიდევ 15%-ით ამ წლის იანვარში.
2022 წლიდან გრიპმა დაახლოებით 162 მილიონი ქათამი, ინდაური და სხვა ფრინველი იმსხვერპლა.
აშშ-ს დაავადებათა კონტროლისა და პრევენციის ცენტრს ჯერ კიდევ სჯერა, რომ ფრინველის გრიპი დაბალ რისკს წარმოადგენს ადამიანებისთვის.
სამსახურიდან გათავისუფლება
აშშ-ის სოფლის მეურნეობის დეპარტამენტმა ოთხშაბათს განაცხადა, რომ მან შემთხვევით გაათავისუფლა რამდენიმე თანამშრომელი, რომლებიც ფრინველის გრიპის გავრცელების წინააღმდეგ მუშაობდნენ.
სამუშაო ადგილების შემცირება არის სახელმწიფო ხარჯების შემცირების უფრო ფართო გეგმის ნაწილი, რომელსაც ხელმძღვანელობს ელონ მასკის ახალი მთავრობის ეფექტურობის დეპარტამენტი (DOGE).
USDA ამჟამად ცდილობს ხელახლა დაიქირაოს თანამშრომლები, რომლებსაც კონტრაქტები გაუქმდა.
წყარო: euronews.com
