ღვინის ეროვნული სააგენტოს მხარდაჭერით, ქართული ღვინის 13 კომპანია, მსოფლიოს 52 ქვეყნის 3 ათასზე მეტ მწარმოებელთან ერთად, მასშტაბურ გამოფენაში „VinExpo Paris“ მონაწილეობდა.
„მსგავსი მასშტაბის ღონისძიებაში მონაწილეობით, ქართული ღვინის საერთაშორისო ცნობადობა იზრდება, რაც მეწარმეებს ახალი სავაჭრო პარტნიორებისა და პოტენციური იმპორტიორების მოძიების შესაძლებლობას აძლევს. ღვინის ეროვნული სააგენტოს მხარდაჭერით, მიმდინარე წელს, ღვინის კომპანიები აშშ-ში, ევროპისა და აზიის ქვეყნებში 20-მდე საერთაშორისო გამოფენაზე წარადგენენ ქართულ საუკეთესო ღვინოებს“, – აღნიშნა ღვინის ეროვნული სააგენტოს თავმჯდომარის მოადგილემ, დავით ტყემალაძემ.
საფრანგეთის დედაქალაქ პარიზში გამართულ ღვინისა და ალკოჰოლიანი სასმელების საერთაშორისო გამოფენაში „VinExpo Paris“, ღვინის ეროვნული სააგენტოს მხარდაჭერით, ქართული ღვინის მწარმოებელი 13 კომპანია მონაწილეობდა:
→ მეღვინეობა ხარება • Winery Khareba;
→ მეღვინეობა იყალთო • Winery Ikalto;
→ ქიმერიონი • Qimerioni Wines;
→ რთველისი • Rtvelisi;
→ ფალავანი • Palavani;
→ თბილღვინო • Tbilvino;
→ ბოლერო და კომპანი • Bolero & Co;
→ თელიანი ველი • Teliani Valley;
→ Tsereteli Winery;
→ ქართული ღვინის გილდია • Georgian Wine Guild;
→ ვილა მოსავალი • Villa Mosavali;
→ მეღვინეობა შილდა • Shilda Winery;
→ შატო ბრუალე • Chateau Bruale.
სამი დღის განმავლობაში, მსოფლიოს 52 ქვეყნის 3 ათასზე მეტმა მწარმოებელმა საკუთარი პროდუქცია გამოფენის ათასობით ვიზიტორს გააცნო. VinExpo Paris-ზე, ტრადიციულად, თავს იყრიან ღვინის პროფესიონალები, იმპორტიორები და ექსპერტები მსოფლიოს მრავალი ქვეყნიდან.
„ჩემთვის ძალიან ამაღელვებელი იყო 2022 წლის მოსავლის ღვინოების დაგემოვნება. გამორჩეული იყო სხვადასხვა მწარმოებლის საფერავის ღვინოები. აღსანიშნავია ღვინოების მაღალი ხარისხი და ჯიშების მრავალფეროვნება საქართველოს სხვადასხვა კუთხიდან. განსაკუთრებით აღვფრთოვანდი ქვევრის ქარვისფერი ღვინოებით, რომლის ხარისხსაც ახლა რენესანსის პერიოდი აქვს“, – აღნიშნა ბრიტანელმა ღვინის მაგისტრმა, სარა ებოტმა.
გამოფენის პარალელურად, სადეგუსტაციო სივრცეში წარმოდგენილი იყო სხვადასხვა დასახელების ქართული ღვინოები, რაც ხელს უწყოდა უფრო მეტი პროფესიონალი ვიზიტორის დაინტერესებას. განსაკუთრებით აღსანიშნავია, რომ სადეგუსტაციო სივრცეში, 2022 წლის აშშ-ის საუკეთესო სომელიეს, ვალერია გამპერის (Valeria Gamper) მიერ წარმოდგენილი იყო „მეღვინეობა იყალთოს“ ღვინო „ქვევრის ქისი“.
წყარო: ღვინის ეროვნული სააგენტო
