ევროკომისიამ პოლონეთის პირველი ატომური ელექტროსადგურის მშენებლობისთვის მრავალმილიარდიანი სუბსიდია დაამტკიცა. პრემიერ-მინისტრ დონალდ ტუსკის თქმით, პირველი ტრანში ვარშავას ამ თვეში გადაეცემა.
პროექტის საერთო ღირებულება 42 მილიარდ ევროდ არის შეფასებული. პოლონეთის მთავრობა მზადაა დაფაროს ხარჯების დაახლოებით 30% და უზრუნველყოს სესხების გარანტია მისი განხორციელებისთვის.
პომერანიის სავოევოდეში ლუბიატოვო-კოპალინოს ატომური ელექტროსადგურის მშენებლობის დაწყება მომავალ წელს იგეგმება, ხოლო სამი რეაქტორისა და 3750 მეგავატის სიმძლავრის მქონე ელექტროსადგური ქსელთან 2033 წელს უნდა იყოს შეერთებული.
ვარშავამ ატომური ელექტროსადგურის მშენებლობის შესახებ კონტრაქტი ამერიკულ კომპანია Westinghouse-თან ჯერ კიდევ 2022 წელს გააფორმა. იმ დროს, ნახშირზე მომუშავე ელექტროსადგურები პოლონეთის ელექტროენერგიის საჭიროებების დაახლოებით 70%-ს ფარავდნენ.
მეზობელმა გერმანიამ ბოლო მოქმედი ატომური ელექტროსადგურები 2023 წლის აპრილში დახურა. ამ გადაწყვეტილებას თან ახლდა მწვავე დებატები როგორც პოლიტიკოსებს, ასევე საზოგადოებას შორის: YouGov-ის გამოკითხვის თანახმად, იმ დროს გერმანელების ორი მესამედი ეწინააღმდეგებოდა ატომური ენერგიის სრულ თანდათანობით გაუქმებას.
წყარო: DW
