სომხეთი აზერბაიჯანში ტვირთების ტრანზიტზე შეზღუდვებს ხსნის. ამის შესახებ სომხეთის პრემიერ-მინისტრმა, ნიკოლ ფაშინიანმა, 2026 წლის სახელმწიფო ბიუჯეტის პროექტის განხილვისას განაცხადა, რომელიც საფინანსო, საკრედიტო და საბიუჯეტო საკითხთა საპარლამენტო კომიტეტმა გამართა.
მან აღნიშნა, რომ ეს გადაწყვეტილება მიიღება აზერბაიჯანის პრეზიდენტის, ილჰამ ალიევის განცხადების საპასუხოდ, რომ სომხეთისთვის მსგავსი შეზღუდვები მოიხსნება.
„ეს სომხეთის წინააღმდეგ ბლოკადის მოხსნის პირველი ეტაპია, მაგრამ მნიშვნელოვანია, რომ ჩვენც გადავდგათ საპასუხო ნაბიჯები. დღეიდან ჩვენ მზად ვართ უზრუნველვყოთ სატვირთო მანქანების ტრანზიტი თურქეთიდან აზერბაიჯანში და პირიქით, მარგარა-ეღეგნაძორი-სისიანი-გორისის გზით“, – განაცხადა ფაშინიანმა.
მან დასძინა, რომ ერევანი ჯერჯერობით ამ მარშრუტით შემოიფარგლება, რადგან იქ გზები და საკონტროლო პუნქტები (მათ შორის კორნიძორის საკონტროლო პუნქტი) სათანადო სტანდარტისაა.
სომხეთის მთავრობის მეთაურმა ასევე აღნიშნა, რომ 2026 წლის ბიუჯეტის პროექტი პირველად მიიღება „მშვიდობიან პირობებში“ და ბოლო ერთი წლისა და რვა თვის განმავლობაში სასაზღვრო ცეცხლში არც ერთი სამხედრო მოსამსახურე არ დაღუპულა.
ადრე აზერბაიჯანის პრეზიდენტმა ილჰამ ალიევმა განაცხადა, რომ აზერბაიჯანმა სომხეთში ტვირთების ტრანზიტზე ყველა შეზღუდვა მოხსნა. მისი თქმით, პირველი ასეთი სატრანზიტო ტვირთი ყაზახეთიდან მარცვლეული იყო. ალიევმა ასევე განაცხადა, რომ ერევანსა და ბაქოს შორის „მშვიდობის ეტაპი დაიწყო“. სომხეთის პრემიერ-მინისტრის, ნიკოლ ფაშინიანის ადმინისტრაციამ უკვე მიესალმა ალიევის გადაწყვეტილებას.
ამის შემდეგ, სომხეთის პრემიერ-მინისტრმა ნიკოლ ფაშინიანმა, მადლობა გადაუხადა ყაზახეთის პრეზიდენტ კასიმ-ჟომარტ ტოკაევს, ბაქოსთან სატრანზიტო საკითხის მოგვარებაში გაწეული დახმარებისთვის.
