პომიდვრის ნარჩენებისგან წარმოებულმა ფეხსაცმელმა და ჩანთებმა The Bio Company-ს (TBC) 2021 წლის PETA-ს ვეგანური მოდის დაჯილდოებაზე, საუკეთესო ტექსტილის ინოვაციის ჯილდო მოუტანა.
პრიტეშ მისტრის მიერ დაარსებული სტარტაპი პომიდვრის ნარჩენებისგან ტყავის ალტერნატივას Bioleather ბრენდის ქვეშ აწარმოებს.
ბიოტყავი მზადდება პოლიურეთანის (PU) და პოლივინილქლორიდის (PVC) გამოყენების გარეშე. „ინდოეთი, რომელიც მსოფლიოში პომიდვრის მეორე მწარმოებელია და წელიწადში დაახლოებით 44 მილიონ ტონას მოსავალს იღებს და ნარჩენების პრობლემის წინაშე დგას“, – ამბობს მისტრი. „ეს ნარჩენები, ძირითადად კანისა და თესლის სახით, ბიოტყავის წარმოებისთვის ეკოლოგიურად სუფთა ნედლეულია“.
პომიდორი მდიდარია პექტინით, რაც ხელს უწყობს მოქნილობას და სიმტკიცეს, ხოლო მათი ბოჭკოვანი სტრუქტურა და ბუნებრივი ზეთები ქმნის ტყავის მსგავს ტექსტურას და უზრუნველყოფს ბიოდეგრადირებადობას.
FreshPlaza-ს ცნობით, მისტრიმ კონცეფცია მუმბაიში, თადომალ შაჰანის საინჟინრო კოლეჯში ბიოტექნოლოგიის შესწავლისას შეიმუშავა. ფერმებსა და ტყავის საწარმოებში ვიზიტებმა გამოავლინა როგორც ნარჩენები, ასევე დაბინძურება, რამაც მას პომიდვრის სუბპროდუქტებზე ექსპერიმენტების ჩატარება გადააწყვეტინა.
„თვეები დასჭირდა პომიდვრის სუბპროდუქტებზე ექსპერიმენტებს, სხვადასხვა ფორმულირებების ტესტირებას და ტექსტურასა და გამძლეობაზე მუშაობას, რათა შეგვექმნა მასალა, რომელიც ტყავის მსგავსია, მაგრამ ეკოლოგიურად სრულიად სუფთა და ბიოდეგრადირებადია“, – განმარტავს ის.
2019 წელს პირველი პროდუქტის გამოშვების შემდეგ, TBC-მ დააპატენტა როგორც ტექნოლოგია, ასევე წარმოების პროცესი. კომპანია პომიდვრის ნარჩენებს მაჰარაშტრას, გუჯარატისა და მადჰია-პრადეშის საკვების გადამამუშავებელი ქარხნებიდან და ფერმებიდან იღებს. სურატის ქარხანაში პომიდვრის ნარჩენები ბიოპოლიმერებთან, მცენარეულ შემკვრელებთან და ბუნებრივ ბოჭკოებთან არის შერეული. ნარევი არატოქსიკურია, ვულკანიზებული და დაფარულია მცენარეული საფარით, რაც ზრდის წყალგამძლეობას და გამძლეობას. შედეგად მიიღება პოლიურეთანის და პოლივინილქლორიდის შემცველობის გარეშე, ბიოდეგრადირებადი ტყავის ალტერნატივა.
პირველი მომხმარებლები მოდის, აქსესუარების და საავტომობილო ინდუსტრიის ბრენდები იყვნენ. „ბიოტყავი არ შეიცავს პოლიურეთანს და პოლივინილქლორიდს, რაც მას ჩვეულებრივი ხელოვნური ტყავისგან განასხვავებს. ეს შესანიშნავი ინოვაციაა, მცენარეული წარმოშობის ტყავი გამოირჩევა თავისი უნიკალური წარმოშობით – ნარჩენი პომიდვრიდან“, – ამბობს ნატაშა მანგვანი, ტორონტოში დაფუძნებული ჩანთების ბრენდის, Satuhati-ს დამფუძნებელი. კომპანიამ ბიოტყავის გამოყენება ჩანთების კომერციული წარმოებისთვის 2024 წელს დაიწყო. ავტომწარმოებლები ასევე იკვლევენ მის გამოყენებას ავტომობილების ინტერიერსა და შალითებში.
როდესაც ბიო ტყავის სუნზე ჰკითხეს, მისტრი პასუხობს, რომ მას ნეიტრალური სუნი აქვს და არ ახასიათებს ხელოვნური ტყავის მსგავსი სინთეტიკური ან ქიმიური სუნი.
სურატის ქარხანაში ამჟამინდელი წარმოების სიმძლავრე თვეში დაახლოებით 5000 მეტრი ტყავია. „ეს წარმოების სიმძლავრე მასშტაბირებადია და მოთხოვნის ზრდასთან ერთად, ჩვენ ვმუშაობთ წარმოების გაფართოებაზე, მასალის ხარისხისა და მდგრადობის პრიორიტეტად შენარჩუნებით“, ამბობს მისტრი.
წყარო: freshplaza
