გერმანიაში ბალტიისა და ჩრდილოეთის ზღვების ყველაზე ცნობილი და პოპულარული სანაპირო კურორტები სილტიდან – პრეროუმდე.
გერმანულ სიტყვას „Kurort“ თარგმანი არ სჭირდება – დასვენების, გაჯანსაღების, ჯანმრთელობის გაუმჯობესების ადგილი. გერმანიაში ზღვისპირა კურორტებისთვის გამოიყენება სპეციალური აღნიშვნა – „სიბადის“ (Seebad), ანუ სანაპირო კურორტი. თუმცა, ბალტიის ან ჩრდილოეთის ზღვის სანაპიროზე მდებარე ყველა ქალაქს, დასახლებას ან აქ არსებული მრავალი გერმანული კუნძულიდან რომელიმეს ოფიციალურად არ შეუძლია ამ აღნიშვნის გამოყენება.
„სიბადის“ სტატუსის მისაღებად აუცილებელია გარკვეული მოთხოვნების დაკმაყოფილება, რომლებიც ფედერალური მიწების მიერ არის განსაზღვრული. კიდევ უფრო ფართო და განსაკუთრებული მოთხოვნები დაწესებულია სამკურნალო-გამაჟანსაღებელ ზღვისპირა კურორტებზე – „ზიჰაილბადზე“ (Seeheilbad). ასეთ ადგილებში აუცილებელია სპა ექიმები, ჰაერისა და წყლის ხარისხის უფრო მკაცრი კონტროლი, ცენტრიდან სანაპირო ზოლამდე მანძილი არ უნდა აღემატებოდეს ორ კილომეტრს, უნდა იყოს უნდა იყოს შეთავაზებული სერტიფიცირებული და სამედიცინო თვალსაზრისით დადასტურებული თერაპიები და ა.შ.
აქ მოგიყვებით გერმანიის სანაპიროსა და გერმანიის კუნძულებზე მდებარე ათ ყველაზე ცნობილ და პოპულარულ სანაპირო კურორტზე. სია კონკრეტული თანმიმდევრობით არ არის დალაგებული, მაგრამ ყველაზე ცნობილით დავიწყებთ.
სილტის კუნძული
სილტის კუნძული (Sylt) ცნობილია, როგორც საყვარელი დასასვენებელი ადგილი ცნობილი და შეძლებული ადამიანებისთვის, თუმცა ეს არ ნიშნავს, რომ ყველა სხვას შესვლა ეკრძალება. ამ ჩრდილოეთ ფრიზიული კუნძულის დასავლეთ ქვიშიანი პლაჟი ორმოცი კილომეტრზეა გადაჭიმული.
აქ ყველა იპოვის თავისი გემოვნებისა და მოთხოვნილების შესაბამის ადგილს. გასულ წელს სილტს თითქმის 870 ათასი დამსვენებელი ეწვია. თითოეულმა მათგანმა აქ საშუალოდ შვიდი დღე გაატარა.
ბორკუმი
ბორკუმი (Borkum) აღმოსავლეთ ფრიზების კუნძულების ნაწილია. მან კურორტის სტატუსი 1830 წელს მიიღო, ზღვის ჰაერის წყალობით, რომელიც მარილის იონებით ძლიერ არის გაჯერებული და განსაკუთრებით ხელსაყრელი კლიმატის წყალობით, რომელიც ალერგიით დაავადებულთათვისაა ხელსაყრელი. კუნძულის მიმდებარე არაღრმა წყლები ქვემო საქსონიის ვადენის ზღვის ეროვნული პარკის ნაწილია.
კუნძულს არა მხოლოდ ქვიშიანი პლაჟები, არამედ საფეხმავლო და ცხენებით ჯირითის ბილიკებიც აქვს. ხმამაღალი მუსიკა და გართობა მიღებულია სპეციალურ ახალგაზრდულ პლაჟზე (Jugendbad), ასევე შეგიძლიათ ითამაშოთ ფრენბურთი, ფეხბურთი და გაერთოთ ფრანებით.
რუგენის კუნძული
რიუგენი (Rügen) გერმანიის უდიდესი კუნძულია. ყოველწლიურად მილიონზე მეტი სტუმარი ჰყავს. პირველი დამსვენებლები აქ ორასი წლის წინ ჩამოვიდნენ, როდესაც ღარიბი სათევზაო სოფლების გვერდით პირველი კურორტები დაარსდა, ძირითადად ბერლინიდან ჩამოსული დიდგვაროვნებისა და მდიდარი საზოგადოებისთვის.
რიუგენის მთავარ არქიტექტურულ სიმბოლოდ ითვლება ზღვის ნავმისადგომი კურორტ ზელინში – ზებრიუკე ზელინი, რომელიც 1997 წელს აღადგინეს და ზღვაშია შესული. რიუგენის ყველაზე პოპულარული პლაჟებია ბინცის (Binz) მრავალკილომეტრიანი პლაჟები, ასევე შმიტის სანაპიროზე მდებარე შააბე (Schaabe).
კუნძული ჰიდენზეე
რიუგენიდან შეგიძლიათ სწრაფად ბორნით გაემგზავროთ გერმანიის ერთ-ერთ ყველაზე რომანტიკულ კუნძულზე – ჰიდენზეე (Hiddensee). აქ აკრძალულია შიდა წვის ძრავით აღჭურვილი სატრანსპორტო საშუალებების მოძრაობა. მისი სიგრძე არ აღემატება 17 კილომეტრს, სიგანე კი გაცილებით ნაკლები. კუნძულზე ხალხი ეტლებით, ელექტრომობილებითა და ველოსიპედებით მოძრაობს, თუმცა ფეხით სიარული კიდევ უფრო სასიამოვნოა.
ჰიდენზეეს კუნძულმა ფართო პოპულარობა გასული საუკუნის დასაწყისში მოიპოვა, ლიტერატურის დარგში გერმანელი ნობელის პრემიის ლაურეატის, გერჰარტ ჰაუპტმანის წყალობით, რომელიც ზაფხულის თვეებს აქ, თავის მყუდრო აგარაკზე ატარებდა.
იუსტის კუნძული
იუისტის კუნძული (Juist), ასევე ცნობილი როგორც იუსტი. კიდევ ერთი გერმანული კუნძული, სადაც მანქანები არ დადიან. მისი სიგრძე 17 კილომეტრია. ამავდროულად, მაქსიმალური სიგანე ერთ კილომეტრს არ აღემატება, ხოლო მინიმალური – 500 მეტრს.
აქ მხოლოდ ათასხუთასი ადამიანი ცხოვრობს, თუმცა მის სასტუმროებსა და პანსიონატებში წელიწადში დაახლოებით 95 ათასი ტურისტი რჩება. რამდენიმე წლის წინ საზოგადოებრივმა ტელევიზიამ NDR მას ჩრდილოეთ გერმანიის ყველაზე დასასვენებელი და ლამაზი კუნძულად უწოდა.
სანქტ-პეტერ-ორდინგი
შლეზვიგ-ჰოლშტაინის სანაპიროზე მდებარე სანქტ-პეტერ-ორდინგის კურორტი (Sankt Peter-Ording) პოპულარულია კაიტსერფინგის მოყვარულთა შორის. მას გერმანიის დასავლეთ სანაპიროზე ერთ-ერთი ყველაზე გრძელი ქვიშიანი პლაჟი აქვს.
სანქტ-პეტერ-ორდინგი ასევე ერთადერთი ზღვისპირა კურორტია გერმანიაში, სადაც საცურაო ზონაა გოგირდწყალბადის აბაზანებით. წყლის დაბალი მოქცევის დროს ადგილობრივ პლაჟებზე წყალი თითქმის 200 მეტრით იხევს. ყოველწლიურად, ამ კუნძულზე 250 ათასი ადამიანი ატარებს არდადეგებს. გარდა ამისა, კიდევ რამდენიმე ასეული ათასი ადამიანი ჩამოდის აქ ერთი დღით ცურვისთვის ღამის გათევის გარეშე.
უზედომის კუნძული
კუნძული უზედომი (Usedom) ბალტიის ზღვაში, მდინარე ოდერის შესართავთან ახლოს მდებარეობს და გერმანიასა და პოლონეთს შორისაა გაყოფილი. კუნძულის გერმანულ ნაწილში ყველაზე ცნობილი კურორტებია ალბეკი, ბანსინი და ჰერინგსდორფი.
ტურიზმი აქ გასული საუკუნის დასაწყისში დაიწყო განვითარება. ცნობილ სტუმრებს შორის იყვნენ მწერლები თომას მანი, თეოდორ ფონტანე და კურტ ტუჩოლსკი. ალბეკში გერმანიაში უძველესი ძელების ნავმისადგომია. ამ კუნძულს ასევე აქვს ევროპაში ყველაზე გრძელი სანაპირო პრომენადი, რომელიც თითქმის 8,5 კილომეტრზეა გადაჭიმული. პლაჟების საერთო სიგრძე ორმოც კილომეტრს აჭარბებს.
უზედომი პოპულარულია ველოსიპედისტებში. კუნძულის გერმანულ ნაწილში ვიზიტორთა წლიური რაოდენობა მილიონს უახლოვდება.
ამრუმის კუნძული
ჩრდილოეთის ზღვაში, ამრუმის კუნძულზე (Amrum), გერმანიაში ერთ-ერთი ყველაზე ფართო ქვიშიანი პლაჟი – კნიპსანდი მდებარეობს. მისი სიგანე 1,5 კილომეტრია, სიგრძე კი 16 კილომეტრი. ამრუმი ასევე ცნობილია თავისი ბუნებით და მრავალი გადაშენების პირას მყოფი და იშვიათი სახეობის ცხოველისა და მცენარის სამშობლოა.
მიქცევის დროს, აქედან შეგიძლიათ ფეხშიშველი იაროთ სანაპირო არაღრმა წყლის სველ ფსკერზე გიდის თანხლებით მეზობელ კუნძულ ფერამდე. უნდა აღინიშნოს, რომ ასეთ გასეირნებაზე პროფესიონალური ხელმძღვანელობის გარეშე სიარული უკიდურესად საშიშია, რადგან ვადენის ზღვის მოქცევა სწრაფად მოდის და შეუძლია დაგვიანებული მოგზაურები ნაპირიდან მოწყვიტოს.
ტიმენდორფერ-სტრანდი
ზღვისპირა კურორტი ტიმენდორფერ შტრანდი (Timmendorfer Strand) შლეზვიგ-ჰოლშტაინში, ჰანზას ქალაქ ლიუბეკიდან 15 კილომეტრში მდებარეობს. აქ სანაპირო ზოლი სწორია, სიღრმე თანდათან იზრდება, რაც მას განსაკუთრებით შესაფერისს ხდის ბავშვებთან ერთად დასვენებისთვის.
ტიმენდორფერ შტრანდმა ზღვისპირა კურორტის სტატუსი 1951 წელს მიიღო. ამავდროულად, აშენდა ახალი სასტუმროები და სხვა საკურორტო შენობები. ყოველწლიურად აქ დასასვენებლად 180 ათასზე მეტი ადამიანი ჩამოდის, სამეზობლოში ბევრი კერძო სანაპირო ვილა და სახლია.
პრეროუ
ჩვენს გასეირნებას დასავლეთ პომერანიაში, როსტოკსა და შტრალსუნდს შორის ნახევარკუნძულზე, ბალტიისპირეთის კურორტ პრეროუს (Prerower Nordstrand) ჩრდილოეთ სანაპიროზე დავასრულებთ. მიუხედავად იმისა, რომ ის ჩვენს სიაში ბოლოა, პრეროუს მნიშვნელობა ამით არ უნდა შევაფასოთ, ბევრი დამსვენებელი ამ ხუთკილომეტრიან პლაჟს გერმანიაში ულამაზესად მიიჩნევს.
ამ პლაჟის ნაწილი ნუდისტებს ეთმობა და ეს უკვე ნახევარი საუკუნეა არსებობს. პლაჟის გარდა, შეგიძლიათ ეწვიოთ 400 მეტრიან ზღვის ნავმისადგომს, გაისეირნოთ სანაპირო ბულვარზე ან დაათვალიეროთ ყოფილი სათევზაო სოფლის ცენტრი, რომელიც საუკუნეზე მეტი ხნის წინ ზღვისპირა კურორტად გადაკეთდა.
წყარო: dw.com
