დიდ ბრიტანეთში ყოველდღიურად 1 მილიონი ბანანი იყრება. რას აკეთებს Tesco ნარჩენების შესამცირებლად? Tesco ნარჩენების შესამცირებლად ასორტიმენტში „სახლში დამწიფებულ“ ბანანს ამატებს.
დიდ ბრიტანეთში მყიდველებს ბანანის შეძენისას მეტი არჩევანი ექნებათ Tesco-ს ახალი ინიციატივის წყალობით, რომელიც მიზნად ისახავს საყოფაცხოვრებო საკვების ნარჩენების შემცირებას.
ბანანი დიდი ბრიტანეთის სუპერმარკეტებში შეძენილი ერთ-ერთი ყველაზე პოპულარული პროდუქტია, მაგრამ ის ასევე ერთ-ერთი ყველაზე ხშირად გადაყრილი პროდუქტია – ნაყოფი სწრაფად მწიფდება და ხშირად ნაგავში იყრება. FreshPlaza-ს ცნობით, უახლესი მონაცემებით, დიდი ბრიტანეთის ოჯახები ყოველდღიურად ერთ მილიონ ბანანს ყრიან.
Tesco იმედოვნებს, რომ ამ პრობლემის მოგვარებას თავის ასორტიმენტში „სახლში დამწიფებული“ ბანანის დამატებით შეძლებს (ბანანი გაიყიდება იმ კონდიციაში, რომ თანდათან დამწიფდეს). ეს ბანანები მყიდველებს მეტ მოქნილობას მისცემს, რაც რამდენიმე დღის განმავლობაში შენახვის ვადას უზრუნველყოფს და ყოველკვირეული მოხმარების უკეთ დაგეგმვაში დაეხმარება.
ახალი პროექტის გაშვება დიდ ბრიტანეთში ბანანზე მაღალი მოთხოვნის ფონზე მოხდა, გასულ წელს დაახლოებით ოთხი მილიარდი ბანანი გაიყიდა, რაც წინა წელთან შედარებით 2.6%-ით მეტია.
Tesco-ს ბანანის მყიდველმა დენ ბენტლიმ განაცხადა: „ბანანი არასდროს ყოფილა ასეთი პოპულარული მისი კვებითი ღირებულებისა და კულინარიაში, ცხობასა და სმუზიში გამოყენების მრავალფეროვნების გამო. გასულ წელს მოთხოვნის უზარმაზარი ზრდა ვიხილეთ, თითქმის 15 მილიონით მეტი ბანანი გაიყიდა, ვიდრე წინა წელს. მაგრამ იმის გამო, რომ ისინი ძალიან სწრაფად მწიფდებიან, ვიმედოვნებთ, რომ შენახვის ვადის ეს გახანგრძლივებული ვარიანტი მომხმარებლებს საშუალებას მისცემს, უკეთ დაგეგმონ და შეამცირონ საკვების ნარჩენები სახლში“.
გადაწყვეტილება Tesco-ს მიერ ჩატარებული გამოკითხვის შემდეგ იქნა მიღებული, რომლის მიზანიც მომხმარებელთა პრეფერენციებისა და ბანანის შეძენის ჩვევების უკეთ გაგება იყო. გამოკითხვამ აჩვენა, რომ მყიდველების უმეტესობა ერთდროულად ერთ შეკვრას ყიდულობს, განსაკუთრებით ისინი, ვინც ონლაინ ყიდულობენ. ბევრი მომხმარებელი დღეში ერთ ბანანს მიირთმევს და ელის, რომ შეკვრა მინიმუმ ხუთი დღე გაძლებს. ისინი, ვინც ერთფეროვან ბანანს ყიდულობენ, უპირატესობას საშუალო სიმწიფის მქონე ბანანს ანიჭებენ, ხოლო მყიდველები, რომლებიც რამდენიმე შეკვრას ყიდულობენ, მოტივირებულნი არიან სიახლით და ხშირად გეგმავენ ბანანის შეძენას სიმწიფის სხვადასხვა დონით. ონლაინ მყიდველები ასევე უპირატესობას ანიჭებენ უფრო მწვანე ბანანს.
ახალი „სახლში დამწიფებული“ ბანანი ხუთცალიან შეფუთვაში გამოვა, რომლებიც წებოვანი ლენტით იქნება დამაგრებული და პროდუქტის სახელით იქნება მკაფიოდ მონიშნული. მათი ფასი 78 პენსი იქნება – იგივე, რაც Tesco-ს მწიფე ბანანის შეკვრა.
