ადრეული დასაწყისი და მაღალი ფასი: უზბეკეთში ალუბლის სეზონი დაიწყო.
ბოლო კვირის განმავლობაში, უზბეკეთის დედაქალაქის საბითუმო ბაზრებზე ალუბლის პირველი დიდი პარტიები გამოჩნდა.
მიმდინარე სეზონის განსაკუთრებული მახასიათებელია ამ პროდუქტის რეკორდულად მაღალი ფასი, რაც განპირობებულია უცხოურ ბაზრებზე უზბეკური ალუბლის უპრეცედენტოდ მაღალი მოთხოვნით, აღნიშნავენ EastFruit-ის სპეციალისტები.
ამ სეზონზე, ამ პროდუქტის პირველი საბითუმო პარტიები ბოლო ხუთი წლის განმავლობაში მინიმუმ ერთი კვირით ადრე გამოჩნდა. ამავდროულად, ახალი ალუბლის საშუალო საბითუმო ფასი წინა წლების ანალოგიურ პერიოდთან შედარებით სულ მცირე 70%-ით მეტია.
EastFruit-ის ფასების მონიტორინგის მონაცემებით, 2025 წლის 23 მაისის მდგომარეობით, უზბეკეთში ახალი ალუბლის საშუალო საბითუმო ფასი 17 000 სუმი/კგ იყო (1.32 აშშ დოლარი). შედარებისთვის: 2023 და 2021 წლებში პირველი საბითუმო პარტიები მხოლოდ მაისის ბოლოს გამოჩნდა, საშუალო ფასით, შესაბამისად, 8000 სუმი/კგ (0.70 აშშ დოლარი) და 10000 სუმი/კგ (0.95 აშშ დოლარი).
ბაზრის მონაწილეების თქმით, ალუბლის მოსავლის მოცულობა ამ სეზონზე დაახლოებით იგივე იქნება, რაც წინა რამდენიმე წლის განმავლობაში. თუმცა, ქვეყნის შიდა ბაზარზე სტაბილური მოთხოვნის გათვალისწინებით, ამ პროდუქტის ასეთი რეკორდულად მაღალი ფასები, უცხოურ ბაზრებზე უზბეკური ალუბლის მოთხოვნის ზრდით არის განპირობებული.
უზბეკეთში ალუბლის ბაზარი ნამდვილ ბუმს განიცდის: რუსი და ბელარუსი იმპორტიორების მოთხოვნა უპრეცედენტოდ მაღალია. გარდა ამისა, ბაზრის მონაწილეების თქმით, 2025 წლის 19 მაისს უზბეკეთის დედაქალაქში ჩავიდა სერბული კომპანიების დელეგაცია, რომლებიც დაინტერესებულნი არიან უზბეკური ალუბლისა და გარგარის იმპორტით.
უზბეკური ალუბლის მიმართ ასეთი მაღალი ინტერესი განპირობებულია იმ უზარმაზარი ზიანით, რომელიც 2025 წლის აპრილ-მაისის ყინვებმა, აღმოსავლეთ და ცენტრალური ევროპის ქვეყნებში კურკოვანი ხილის მოსავალს მიაყენა.
წყარო: EastFruit
