ყაზახეთის ატირაუს რეგიონში ლოჯისტიკური ცენტრი ITC WEST გაიხსნა, რომელიც სოფლის მეურნეობის პროდუქტების მიწოდებაზეა ორიენტირებული. ლოჯისტიკური ცენტრი 30 ჰექტარ ფართობს მოიცავს.
ცენტრი მოიცავს ხუთ რკინიგზის ხაზს, კონტეინერების საწყობს, საკუთარ ავტოპარკს, A კატეგორიის საწყობებს (5 400 მ2), საწარმოო კომპლექსებს და ბოსტნეულის შესანახ ობიექტს.
ბოსტნეულის შესანახი ობიექტი 8 200 მ2 ფართობს და 28 შესანახ კამერას მოიცავს. ტემპერატურული რეჟიმი -25°C-დან +25°C-მდე რეგულირდება. ასევე დამონტაჟებულია ტემპერატურისა და ტენიანობის ავტომატური კონტროლის სისტემები, თანამედროვე სამაცივრე დანადგარები, ვენტილაცია და მიკროკლიმატის კონტროლის სისტემები.
ენერგოეფექტური საინჟინრო გადაწყვეტილებები უზრუნველყოფს ობიექტის შეუფერხებელ და ეკონომიურ ფუნქციონირებას.
ცენტრის დირექტორის, ბაურჟან ჟოლმუხანოვის თქმით, ობიექტის მშენებლობა ორი წლის წინ დაიწყო. ახლად შექმნილი ინფრასტრუქტურა წარმოების ხარჯების შემცირების საშუალებას იძლევა.
„სახელმწიფოსა და რეგიონული აკიმატის მხარდაჭერით აშენდა 15 500 ტონა ტევადობის ბოსტნეულის შესანახი ობიექტი. ცენტრმა აამოქმედა ბანანის დამწიფების კამერა, რომელიც უნიკალურია დასავლეთ ყაზახეთისთვის. მომხმარებლის მოთხოვნიდან გამომდინარე, შესაძლებელია ბანანის თანდათანობით დამწიფება და ბაზარზე გაშვება“, – აღნიშნა ბაურჟან ჟოლმუხანოვმა.
წყარო: eldala.kz
