ყაზახეთი და ჩინეთი შეთანხმდნენ მარცვლეულით ვაჭრობის ერთობლივი ციფრული პლატფორმის შექმნაზე, რომელიც ორ ქვეყანას შორის აგროპროდუქციით ვაჭრობას გაამარტივებს და დააჩქარებს.
პროექტი „ერთი სარტყელი – ერთი გზის“ (Belt and Road Initiative) ფარგლებში განხორციელდება და ჩინეთის უკვე მოქმედ ეროვნულ ინტერნეტპლატფორმას დაეფუძნება.
შეთანხმება ყაზახეთის სოფლის მეურნეობის ვიცე-მინისტრის, ერმეკ კენჟეხანულისა და ჩინეთის სურსათისა და სტრატეგიული რეზერვების ეროვნული ადმინისტრაციის (NAFRA) ხელმძღვანელის, ლიუ ხუანსინის შეხვედრის შემდეგ გაფორმდა. ახალი პლატფორმა ორივე ქვეყნის კომპანიებს საშუალებას მისცემს, გარიგებები როგორც კონკურენტული ტენდერების, ისე პირდაპირი მოლაპარაკებების გზით დადონ.
პირველ ეტაპზე პლატფორმის ძირითადი მიმართულება სოიოსა და სხვა ზეთოვანი კულტურებით ვაჭრობა იქნება, თუმცა მხარეებმა ასევე განიხილეს მარცვლეულისა და ზეთოვანი კულტურების გრძელვადიანი მიწოდების კონტრაქტები, ლოჯისტიკური ჰაბებისა და მშრალი პორტების განვითარება, ასევე სასოფლო-სამეურნეო პროდუქციის შენახვისა და გადამუშავების ტექნოლოგიების გაცვლა.
ყაზახეთის სოფლის მეურნეობის სამინისტროს მონაცემებით, ორ ქვეყანას შორის აგროსასურსათო ვაჭრობა სწრაფად იზრდება. 2025 წელს ორმხრივმა სავაჭრო ბრუნვამ 36,8%-ით მოიმატა და 1,97 მილიარდ აშშ დოლარს მიაღწია, ხოლო 2026 წლის პირველ კვარტალში ზრდამ უკვე 61,7% შეადგინა. ამავე პერიოდში ყაზახეთის აგროსასურსათო ექსპორტი ჩინეთში 82,4%-ით გაიზარდა და 550 მილიონ დოლარს მიაღწია.
დღეისათვის ყაზახეთსა და ჩინეთს შორის შეთანხმება გაფორმებულია 34 სახეობის აგროპროდუქციის ექსპორტზე, ხოლო ჩინეთის ბაზარზე პროდუქციის გატანის უფლება უკვე 3 600-ზე მეტ ყაზახურ საწარმოს აქვს. ახალი ციფრული პლატფორმის ამოქმედება, ოფიციალური პირების შეფასებით, სავაჭრო პროცესს კიდევ უფრო გაამარტივებს და ორ ქვეყანას შორის მარცვლეულისა და სხვა სასოფლო-სამეურნეო პროდუქციის ექსპორტის ზრდას შეუწყობს ხელს.
წყარო: Qazinform
