ყავის მსოფლიო ფასების ზრდისა და კლიმატის ცვლილებით გამოწვეული წარმოების პრობლემების ფონზე, იაპონიაში სულ უფრო მეტი კომპანია ყავის ადგილობრივი წარმოებით ინტერესდება.
მიუხედავად იმისა, რომ ყავის კულტურა ტრადიციულად ტროპიკულ და ეკვატორულ რეგიონებში მოჰყავთ, თანამედროვე სათბურის ტექნოლოგიები მისი წარმოების შესაძლებლობას არატრადიციულ ქვეყნებშიც ქმნის.
ერთ-ერთი ასეთი პროექტი ოსაკაში დაფუძნებულმა ენერგეტიკულმა კომპანიამ Nichibei United Corp-მა განახორციელა. კომპანიამ 2024 წელს ოკაიამას პრეფექტურის ქალაქ სოჯაში ყავის წარმოება დაიწყო და რვა სათბურში 1 100-ზე მეტი ტიპიკას (Typica) ჯიშის ყავის ხე გააშენა.
პროექტის ხელმძღვანელის, კენჯი ცუჯინოს განცხადებით, ყავის წარმოება კომპანიისთვის სრულიად ახალი მიმართულება აღმოჩნდა და პირველივე წელს არაერთი სირთულე გამოიკვეთა.
სათბურები ძლიერი წვიმების შედეგად დაიტბორა, რის გამოც კომპანიას ნარგავების ხელახლა გაშენება და მიწისქვეშა სადრენაჟე სისტემის მოწყობა დასჭირდა. დამატებითი ხარჯები გამოიწვია მიკროკლიმატის შენარჩუნებამაც — ზაფხულში მცენარეების დასაცავად ჩრდილის ბადეები გამოიყენება, ხოლო ზამთარში სათბურები თბება, რათა ტემპერატურა 18-24°C-ის ფარგლებში შენარჩუნდეს.
კლიმატის ცვლილება წარმოების გეოგრაფიას ცვლის
ბოლო წლებში მსოფლიოში ყავის ფასები მნიშვნელოვნად გაიზარდა, რასაც ბრაზილიაში, ვიეტნამსა და სხვა მსხვილ მწარმოებელ ქვეყნებში ხანგრძლივი გვალვები, სიცხე და სხვა ექსტრემალური კლიმატური მოვლენები განაპირობებს. სწორედ ამიტომ, სულ უფრო მეტი კომპანია განიხილავს ყავის წარმოებას კონტროლირებად გარემოში, სადაც შესაძლებელია ტემპერატურისა და ტენიანობის მართვა.
ექსპერტების შეფასებით, სათბურებში ყავის მოყვანა ღია გრუნტთან შედარებით გაცილებით ძვირია, თუმცა მაღალი საბაზრო ფასებისა და თანამედროვე ტექნოლოგიების განვითარების ფონზე, ასეთი პროექტები ეკონომიკურად უფრო მიმზიდველი ხდება. თუ ეს ტენდენცია გაგრძელდება, უახლოეს წლებში ყავის წარმოების გეოგრაფია შესაძლოა თანდათან გაფართოვდეს და ახალი ქვეყნები მოიცვას.
წყარო: Japan Today
რა გავლენას ახდენს ყავა ჩვენს განწყობაზე?
