ტროპიკული ხილის მსოფლიოს ერთ-ერთი უმსხვილესი კომპანია რეგენერაციულ სოფლის მეურნეობაზე გადადის — მიზანი კლიმატური რისკების შემცირება, ნიადაგის გაჯანსაღება და მიწოდების ჯაჭვების მდგრადობის გაძლიერებაა.
ტროპიკული ხილის საერთაშორისო ბაზარზე რეგენერაციული სოფლის მეურნეობა სულ უფრო მნიშვნელოვან მიმართულებად ყალიბდება. კომპანია Fyffes-მა, რომელიც მსოფლიოში ბანანისა და ანანასის ერთ-ერთი უმსხვილესი მწარმოებელი და მომწოდებელია, ახალი Regenerative Agriculture Framework წარადგინა, რომლის მიზანიც რეგენერაციული პრაქტიკების ფართო დანერგვაა.
გეგმის მიხედვით, 2030 წლისთვის კომპანიის კუთვნილ ყველა ბანანისა და ანანასის ფერმაში რეგენერაციული მეურნეობის პრინციპები უნდა დაინერგოს, ხოლო 2035 წლისთვის ეს მიდგომა მომწოდებელთა ქსელის მნიშვნელოვან ნაწილზეც გავრცელდება. საერთო ჯამში პროგრამა დაახლოებით 13 000 ჰექტარ სასოფლო-სამეურნეო მიწას მოიცავს.
კომპანიის განმარტებით, ინიციატივის მთავარი ამოცანებია ნიადაგის ჯანმრთელობის გაუმჯობესება, ბიომრავალფეროვნების ზრდა, წყლის რესურსების უფრო ეფექტიანი გამოყენება, აგროქიმიკატებზე დამოკიდებულების შემცირება და კლიმატის ცვლილების მიმართ ფერმების მდგრადობის გაძლიერება.
რეგენერაციული სოფლის მეურნეობა ბოლო წლებში ერთ-ერთ ყველაზე აქტიურად განხილულ მიმართულებად იქცა. განსხვავებით ტრადიციული მდგრადი მეურნეობისგან, მისი მიზანი მხოლოდ გარემოზე ზემოქმედების შემცირება არ არის. მთავარი იდეაა სასოფლო-სამეურნეო ეკოსისტემების აღდგენა და გაძლიერება — ნიადაგის ორგანული ნივთიერებების ზრდა, წყლის უკეთ შეკავება, ბუნებრივი ეკოსისტემების მხარდაჭერა და ნახშირბადის დაგროვების ხელშეწყობა.
Fyffes-ის პროგრამა ეფუძნება რვა ძირითად პრინციპს, მათ შორის ნიადაგის მუდმივი საფარის შენარჩუნებას, ნიადაგის მინიმალურ დამუშავებას, მცენარეთა მრავალფეროვნების გაზრდას, სასუქებისა და პესტიციდების გამოყენების ოპტიმიზაციას და წყლის მართვის გაუმჯობესებას.
კომპანიაში მიიჩნევენ, რომ ასეთი მიდგომა მხოლოდ გარემოსდაცვითი ინიციატივა არ არის. ბანანისა და ანანასის წარმოება სულ უფრო ხშირად აწყდება ექსტრემალურ ამინდს, გვალვებს, წყლის დეფიციტსა და სხვა კლიმატურ გამოწვევებს. შესაბამისად, ნიადაგის უკეთესი მდგომარეობა და ბიომრავალფეროვნების გაზრდა პირდაპირ უკავშირდება მოსავლიანობისა და მიწოდების სტაბილურობას.
მნიშვნელოვანია ისიც, რომ პროგრესის შეფასება სპეციალური Measurement, Reporting and Verification (MRV) სისტემის მეშვეობით მოხდება, რაც კომპანიას საშუალებას მისცემს რეალურად გაზომოს ნიადაგის, წყლის, ბიომრავალფეროვნებისა და კლიმატური მაჩვენებლების ცვლილებები.
მსოფლიო აგროსასურსათო სექტორში რეგენერაციული მეურნეობის მიმართ ინტერესი სწრაფად იზრდება. საცალო ქსელები, გადამმუშავებლები და მომხმარებლები სულ უფრო ხშირად ითხოვენ არა მხოლოდ ხარისხიან პროდუქტს, არამედ ისეთ წარმოებასაც, რომელიც გარემოზე ნაკლებ ზემოქმედებას ახდენს და ბუნებრივი რესურსების აღდგენას უწყობს ხელს. სწორედ ამიტომ, მსგავსი ინიციატივები უკვე აღარ განიხილება მხოლოდ გარემოსდაცვით პროექტებად — ისინი ბიზნესის გრძელვადიანი მდგრადობის ნაწილად იქცა.
ფოტო: აგროკავკასია / AI
წყარო: Fruitnet
