დიდი ბრიტანეთის ფერმერთა ეროვნული კავშირი (NFU) მთავრობას მოუწოდებს, დააჩქაროს იმ ღონისძიებების განხორციელება, რომლებიც ფერმერებს სულ უფრო ხშირი და ძლიერი ექსტრემალური ამინდის პირობებთან ადაპტირებაში დაეხმარება.
მოწოდება დაემთხვა 1976 წლის ისტორიული გვალვის 50 წლისთავისადმი მიძღვნილ ღონისძიებებს, სადაც მეცნიერებმა, პოლიტიკოსებმა და სოფლის მეურნეობის სექტორის წარმომადგენლებმა ქვეყნის წყლის რესურსებისა და სასოფლო-სამეურნეო სისტემის მდგრადობის საკითხები განიხილეს.
ამავე პერიოდში საერთაშორისო კლიმატოლოგებმა დაადასტურეს ძლიერი ელ-ნინიოს ფენომენის განვითარება, რომელიც მსოფლიოს მრავალ რეგიონში ჰაერის ტემპერატურის მატებასა და გვალვების გახშირებას უკავშირდება.
ექსტრემალური ამინდი ახალი რეალობაა
NFU-ის ვიცე-პრეზიდენტის, პოლ ტომპკინსის, განცხადებით, ბრიტანეთის სოფლის მეურნეობა სულ უფრო ხშირად აწყდება ისეთი მასშტაბის კლიმატურ მოვლენებს, როგორიც 1976 წლის გვალვა იყო.
მისი თქმით, ფერმერთა 78% აღნიშნავს, რომ ბოლო ათწლეულის განმავლობაში ექსტრემალური ამინდის მოვლენები მნიშვნელოვნად გახშირდა.
ტომპკინსის შეფასებით, სასოფლო-სამეურნეო სავარგულები ერთ წელს შესაძლოა წყალდიდობამ დააზიანოს, ხოლო მომდევნო წელს — ხანგრძლივმა გვალვამ. ანალოგიური პრობლემების წინაშე დგას საძოვრებიც, სადაც მონაცვლეობით წყალდიდობა და გვალვა ბალახის წარმოებას ამცირებს და მეცხოველეობას სერიოზულ სირთულეებს უქმნის.
სასურსათო უსაფრთხოება წყლით იწყება
NFU მიიჩნევს, რომ ქვეყნის სასურსათო უსაფრთხოების უზრუნველყოფისთვის აუცილებელია ფერმერებს წყლის რესურსებზე უფრო საიმედო წვდომა ჰქონდეთ.
ორგანიზაცია მთავრობას მოუწოდებს:
- გაამარტივოს ფერმებში წყლის რეზერვუარების მოწყობის პროცედურები;
- წაახალისოს წყლის დაზოგვის ტექნოლოგიებში ინვესტიციები;
- მხარი დაუჭიროს უფრო წყლისეფექტიანი კულტურებისა და წარმოების სისტემების დანერგვას.
1976 წლის გვალვა დღემდე მაგალითად მოჰყავთ
NFU აღნიშნავს, რომ 1976 წლის გვალვა დღემდე ერთ-ერთ ყველაზე მძიმე კლიმატურ მოვლენად ითვლება დიდი ბრიტანეთის სოფლის მეურნეობის ისტორიაში.
იმ წელს ზოგიერთ რეგიონში ქერის მოსავლიანობა 50%-ით შემცირდა, კარტოფილის დეფიციტმა გადამამუშავებელი საწარმოების მუშაობა შეაფერხა, ხოლო ფერმერები წყლის შესაძლო რაციონირების საფრთხის წინაშე აღმოჩნდნენ.
აღმოსავლეთ ინგლისის ფერმერი მაიკლ სლაი, რომელმაც 1976 წლის გვალვა საკუთარი თვალით ნახა, იხსენებს, რომ მინდვრები მთლიანად გამოშრა და მიწა სიცხისგან დაიბზარა.
მისი თქმით, თვეების შემდეგ მოსული პირველი წვიმა ფერმერებისთვის ნამდვილი შვება იყო, თუმცა დღეს, კლიმატის ცვლილების ფონზე, მსგავსი ექსტრემალური მოვლენები გაცილებით ხშირად მეორდება.
კლიმატისადმი მდგრადობა სოფლის მეურნეობის ერთ-ერთი მთავარი გამოწვევაა
ექსპერტების შეფასებით, კლიმატის ცვლილება სოფლის მეურნეობას მსოფლიოს თითქმის ყველა რეგიონში ახალ გამოწვევებს უქმნის. ამიტომ წყლის რესურსების ეფექტიანი მართვა, თანამედროვე სარწყავი სისტემები და კლიმატგონივრული აგროტექნოლოგიების დანერგვა უახლოეს წლებში ფერმერული მეურნეობების კონკურენტუნარიანობის ერთ-ერთი მთავარი ფაქტორი გახდება.
წყარო: NFU
