EastFruit-ის ცნობით, 2025 წელს ეგვიპტემ გაზარდა სუფრის ყურძნის ექსპორტი დიდ ბრიტანეთში, რითაც ექსპორტის ახალი რეკორდი დაამყარა.
HM Revenue & Customs-ის მიერ მოწოდებული Global Trade Tracker-ის მონაცემების თანახმად, დიდმა ბრიტანეთმა 2025 წლის პირველი 10 თვის განმავლობაში ეგვიპტიდან 37 300 ტონა ყურძენი შეიძინა, რომლის ღირებულება 105 მილიონ დოლარს აჭარბებდა.
ეს მოცულობა 24%-ით აღემატება 2023 და 2024 წლების ისედაც წარმატებულ შედეგებს და დიდი ბრიტანეთის ბაზარზე ეგვიპტური ყურძნის ექსპორტის ახალი რეკორდია.
გარდა ამისა, 2025 წელს დიდი ბრიტანეთი ეგვიპტიდან სუფრის ყურძნის ექსპორტის მთავარი მიმართულება გახდა, გადაუსწრო რა მოცულობით ნიდერლანდებსა და რუსეთს.
2021 წლიდან ეგვიპტე დიდი ბრიტანეთის ყურძნის სამ უმსხვილეს მიმწოდებელს შორისაა, მოცულობით კი მხოლოდ სამხრეთ აფრიკასა და ესპანეთს ჩამორჩება. 2023-2024 წლებში ეგვიპტის წილი მთლიან იმპორტში 11% იყო. 2025 წლის პირველი 10 თვის შედეგების მიხედვით, ეს მაჩვენებელი 15%-ს აღემატება.
დიდი ბრიტანეთი მთელი წლის განმავლობაში აქტიურ იმპორტს ახორციელებს, ყოველთვიური მოცულობები კი 16 000-დან 30 000-ტონამდე მერყეობს.
იანვრიდან მარტამდე ბაზარზე სამხრეთ აფრიკის ყურძენი დომინირებს, თუმცა აპრილსა და მაისში მას ინდოეთისა და ჩილეს პროდუქცია ცვლის.
ივნისი სამართლიანად შეიძლება ჩაითვალოს ეგვიპტური ყურძნის თვედ, რადგან ეგვიპტის წილი ბაზარზე 80%-ს აჭარბებს. ივლისში ეგვიპტეს ესპანეთი და იტალია უერთდება, ამ ქვეყნებიდან ყურძენი აგვისტოდან ოქტომბრამდე დომინირებს ბაზარზე, ხოლო ნოემბერი და დეკემბერი პერუსა და ბრაზილიური ყურძნის პიკური სეზონია.
2025 წელს, ესპანეთსა და იტალიაში ყურძნის სეზონის გვიან დაწყებამ ეგვიპტეს საშუალება მისცა, გაერთიანებული სამეფოს ბაზარზე არა მხოლოდ ივნისში, არამედ ივლისშიც გაეგრძელებინა დომინირება, ამ თვისთვის დიდ ბრიტანეთში რეკორდული 15 700 ტონა ექსპორტით. სწორედ ივლისის ამ გადაზიდვებმა გაზარდა ყურძნის წლიური ექსპორტი დიდ ბრიტანეთში, რითაც ახალი რეკორდი დაამყარა.
სუფრის ყურძენი – დარგვა, ვენახის გაშენება, მოვლა-მოყვანის ტექნოლოგია
