თანამედროვე სასოფლო-სამეურნეო ტექნიკა უკვე მხოლოდ მექანიკური დანადგარი აღარ არის. დღეს ტრაქტორს შეუძლია საკუთარი მუშაობის მონაცემების მუდმივი ანალიზი, ტექნიკური მდგომარეობის კონტროლი და მფლობელისთვის ინფორმაციის რეალურ დროში მიწოდება.
სწორედ ამ მიმართულებით ვითარდება Massey Ferguson-ის ახალი თაობის ტელემეტრიული სისტემა MF Connect, რომელიც ფერმერს საშუალებას აძლევს ტექნიკა დისტანციურად აკონტროლოს და შესაძლო პრობლემები სერიოზულ დაზიანებამდე აღმოაჩინოს.
ტელემეტრიის სისტემა ტრაქტორზე დამონტაჟებული სენსორებიდან მუდმივად აგროვებს ინფორმაციას. ის აკონტროლებს ძრავის მუშაობას, საწვავის ხარჯს, ზეთისა და გაგრილების სისტემის პარამეტრებს, სამუშაო საათებს, გადაადგილების მარშრუტსა და სხვა მნიშვნელოვან მონაცემებს. მიღებული ინფორმაცია ინტერნეტის საშუალებით გადაიცემა სპეციალურ პლატფორმაზე, სადაც მისი ნახვა შესაძლებელია კომპიუტერიდან ან მობილური ტელეფონიდან.
თუ რომელიმე პარამეტრი ნორმიდან გადახრილია, სისტემა მფლობელს ან ტექნიკურ პერსონალს დაუყოვნებლივ ატყობინებს. მაგალითად, ძრავის გადახურება, ზეთის წნევის ცვლილება ან სხვა ტექნიკური გაუმართაობის ნიშნები შეიძლება ჯერ კიდევ საწყის ეტაპზე გამოვლინდეს, სანამ პრობლემა სერიოზულ დაზიანებად გადაიქცევა. შედეგად, მცირდება მოულოდნელი გაჩერებების რისკი და ტექნიკის შეკეთებაც გაცილებით ნაკლებ დანახარჯს მოითხოვს.
MF Connect-ის კიდევ ერთი მნიშვნელოვანი შესაძლებლობა ტექნიკის პარკის მართვაა. თუ მეურნეობაში რამდენიმე ტრაქტორი ან სხვა სასოფლო-სამეურნეო მანქანა მუშაობს, ფერმერს შეუძლია ერთ ეკრანზე ნახოს თითოეული მათგანის ადგილმდებარეობა, სამუშაო სტატუსი, საწვავის დონე და შესრულებული სამუშაო. ეს მნიშვნელოვნად ამარტივებს სამუშაო პროცესის დაგეგმვას და ტექნიკის უფრო ეფექტიან გამოყენებას.
სისტემა ტექნიკური მომსახურების დაგეგმვასაც ამარტივებს. პროგრამა ავტომატურად ითვლის ნამუშევარ საათებს და ახსენებს მფლობელს, როდის არის საჭირო ზეთის შეცვლა, ფილტრების გამოცვლა ან სხვა გეგმური მომსახურება. ასეთი მიდგომა ხელს უწყობს ტექნიკის რესურსის გაზრდას და ძვირადღირებული ავარიების თავიდან აცილებას.
ციფრული ტექნოლოგიების განვითარებასთან ერთად ტელემეტრია სოფლის მეურნეობაში სულ უფრო მნიშვნელოვან როლს იძენს. თანამედროვე ფერმერისთვის აღარ არის აუცილებელი მუდმივად იმყოფებოდეს ტექნიკის გვერდით — საკმარისია მობილური ტელეფონი ან კომპიუტერი, რათა ნებისმიერ დროს მიიღოს ინფორმაცია ტრაქტორის მუშაობის შესახებ და საჭიროების შემთხვევაში სწრაფად მიიღოს გადაწყვეტილება.
Massey Ferguson-ის ახალი თაობის ტელემეტრია ნათლად აჩვენებს, რომ თანამედროვე ტრაქტორის ღირებულებას მხოლოდ მისი სიმძლავრე აღარ განსაზღვრავს. არანაკლებ მნიშვნელოვანია, რამდენად ეფექტურად შეუძლია ტექნიკას საკუთარი მდგომარეობის კონტროლი, მფლობელის ინფორმირება და სამუშაო პროცესის უფრო უსაფრთხო და ეკონომიური გახდება.
წყარო: Massey Ferguson
