ყაზახეთში, თურქესტანის რეგიონში, ნივრის ღრმა გადამუშავების დაწყების შესაძლებლობა განიხილეს ჩინეთში გამართულ შეხვედრაზე Wanglin Group-ის (ნივრის წარმოების მსოფლიო ლიდერი) წარმომადგენლებსა და ყაზახეთის დელეგაციას შორის.
მოლაპარაკებები ნივრის კულტივაციისა და გადამუშავების ერთობლივი პროექტების განხორციელებას შეეხო. ჩინურმა საერთაშორისო კომპანიამ საკუთარი გამოცდილება გაუზიარა ყაზახურ მხარეს და მაღალი შეფასება მისცა თურქესტანის რეგიონის აგროკლიმატურ პირობებს. მხარეებმა ინვესტიციების, თანამედროვე გადამამუშავებელი ქარხნების მშენებლობისა და ექსპორტის ლოჯისტიკის განვითარების საკითხები განიხილეს.
„შეხვედრის შემდეგ, მხარეები შეთანხმდნენ, რომ ერთად იმუშავებენ თურქესტანის რეგიონში აგროსამრეწველო კლასტერის შესაქმნელად, ნივრის კულტივაციის მოცულობის გასაზრდელად, ფერმერებთან გრძელვადიანი კონტრაქტების დასადებად და მზა პროდუქციის საზღვარგარეთ ექსპორტზე გასატანად“, – აღინიშნა აკიმატში (ყაზახეთის აღმასრულებელი ხელისუფლების რეგიონალური ორგანო).
ვიზიტის ფარგლებში დელეგაცია გაეცნო კომპანიის გადამამუშავებელ საამქროებსა და ლოჯისტიკურ ინფრასტრუქტურას, მოინახულა ნივრის ღრმა გადამუშავებისა და ექსპორტის წარმოების ობიექტები. ვიზიტის მონაწილეები ასევე გაეცნენ ნივრის მსოფლიო ფასების რეგულირების ცენტრის მუშაობას.
Wanglin Group ნივრის გადამუშავების, გაყინვის, გაშრობის, შენახვისა და გლობალური ბაზრისთვის მიწოდების 20 წელზე მეტი გამოცდილება აქვს. ნათესის საერთო ფართობი 500 ათასი ჰექტარია, წლიური გაყიდვების მოცულობა 8 მილიონი ტონა. ექსპორტის ღირებულება 4 მილიარდი დოლარია. საწყობების შენახვის მოცულობა 4.8 მილიონი ტონაა. ნივრისგან მზადდება მედიკამენტებისა და ვიტამინების ფართო სპექტრი.
„დღევანდელი მოლაპარაკებები მნიშვნელოვანი გარდამტეხი მომენტია თურქესტანის რეგიონისთვის. ჩვენ სოფლის მეურნეობის განვითარების ახალ ეტაპზე გადავდივართ… ჩვენმა ფერმერებმა იციან, როგორ მოიყვანონ ეკოლოგიურად სუფთა პროდუქტები. ახლა მათ ახალი ტექნოლოგიები და ინვესტიციები სჭირდებათ საერთაშორისო ბაზრებზე გასასვლელად. ეს ხელს შეუწყობს სამუშაო ადგილების შექმნას, სოფელში შემოსავლის გაზრდას და ექსპორტის გაფართოებას. ჩვენ ყველაფერს გავაკეთებთ ამის მისაღწევად“, – განაცხადა თურქესტანის რეგიონის ხელმძღვანელმა ნურალხან კუშეროვმა.
წყარო: eldala.kz
