ევროკავშირში მეფუტკრეების მხარდაჭერა ახლა არა ჰექტრებზე, არამედ ფუტკრის სკებზეა დამოკიდებული.
ევროკომისიის გადაწყვეტილება ფუტკრის ოჯახების პირდაპირი სუბსიდიების შემოღების შესახებ, მნიშვნელოვანი ნაბიჯია მეფუტკრეების მხარდაჭერის და ფუტკრების (რომლებიც ევროპის ძირითადი დამამტვერიანებლები არიან და რომლებზეც დამოკიდებულია საკვებისა და გარემოსდაცვითი უსაფრთხოება) დაცვის მიმართულებით.
სლოვენიაში ევროპის მეფუტკრეთა ასოციაციის (EBA) ხელმძღვანელობასა და სოფლის მეურნეობისა და სურსათის ევროკომისარს, ბატონ კრისტოფ ჰანსენს შორის შეხვედრა გაიმართა. სწორედ ამ შეხვედრაზე ოფიციალურად გამოცხადდა ევროკავშირის აგროეკოლოგიური ღონისძიებების ფარგლებში თითოეული ფუტკრის სკისთვის სუბსიდიების შემოღება.
ეს გადაწყვეტილება ფუტკრების, როგორც დამამტვერიანებლების, სასიცოცხლოდ მნიშვნელოვანი როლის აღიარებას და ევროპაში მეფუტკრეობის საზოგადოების მრავალწლიანი მუშაობის შედეგს წარმოადგენს.
ბოლო წლის განმავლობაში ევროპის მეფუტკრეობის ასოციაციის (EBA) მრავალრიცხოვანმა მიმართვამ და ევროპელი პოლიტიკის შემქმნელებთან, კერძოდ, სოფლის მეურნეობისა და სურსათის საკითხებში ევროკომისართან შეხვედრებმა შედეგი გამოიღო.
სოფლის მეურნეობისა და სურსათის საკითხებში ევროკომისარმა, ბატონმა კრისტოფ ჰანსენმა, ხაზი გაუსვა მეფუტკრეების მხარდაჭერისა და თაფლის ხარისხის კონტროლის გამჭვირვალობის უზრუნველყოფის მნიშვნელობას.
კომისარმა მადლობა გადაუხადა ევროპის მეფუტკრეთა ასოციაციის პრეზიდენტს, ბატონ ბოშტიან ნოჩს და აღნიშნა სლოვენიის მეფუტკრეობის, როგორც მთელი ევროპისა და მსოფლიოსთვის ნათელი მაგალითის მნიშვნელობა.
მან ხაზი გაუსვა დამამტვერიანებლების მნიშვნელობას, რომლებიც უდიდეს როლს ასრულებენ მაღალი ხარისხის საკვები პროდუქტებისა და აუცილებელი საკვები ნივთიერებების მრავალფეროვანი სპექტრის უზრუნველყოფაში.
„გამოწვევების მიუხედავად, ევროკავშირი მსოფლიოში თაფლის სიდიდით მეორე მწარმოებელი რჩება, მეფუტკრეებისა და სკების რაოდენობა ბოლო 5 წლის განმავლობაში სტაბილურია. საერთო სასოფლო-სამეურნეო პოლიტიკა (CAP) მნიშვნელოვანი ინსტრუმენტია ფუტკრების დაცვის ხელშემწყობი ეკოლოგიური პრაქტიკის მხარდასაჭერად. ჩვენ ყოველწლიურად გვაქვს 60 მილიონი ევროს ოდენობის სპეციალური ბიუჯეტი მეფუტკრეობისთვის, საიდანაც სლოვენიაც ისარგებლებს“, – აღნიშნა კომისარმა.
„აქამდე, მეფუტკრეობის მხარდაჭერა ძირითადად ჰექტარზე გაიცემოდა. ჩვენ ვთავაზობთ, რომ წევრ სახელმწიფოებს მივცეთ საშუალება, მხარდაჭერა გასცენ სკაზე. ბოლოს და ბოლოს, ვიცი, რომ მეფუტკრეები და მომხმარებლებიც შეშფოთებულნი არიან თაფლის გაყალბებით. მომხმარებლებს ასევე სურთ იცოდნენ, საიდან მოდის მათი თაფლი. ცოტა ხნის წინ ჩვენ გავამკაცრეთ თაფლის ეტიკეტირების წესები, ასევე მისი ხარისხისა და ავთენტურობის უზრუნველყოფა. ჩვენ ასევე გავაძლიერეთ ჩვენი მუშაობა შაქრის სიროფებით თაფლის გაყალბების ანალიზზე და შევქმენით თაფლის პლატფორმა, რომელიც ამ საქმეში დაგვეხმარება“, – დასძინა მან.
კომისარმა ხაზი გაუსვა ფუტკრების დასაცავად თანამშრომლობის გაგრძელების აუცილებლობას – მეფუტკრეების მხარდასაჭერად და სოფლის მეურნეობის მდგრადი მომავლის უზრუნველსაყოფად.
წყარო: agroportal.ua
