იაპონურმა აგროტექნოლოგიურმა კომპანიამ PlantX ტოკიოში მსოფლიოში პირველი სრულად დახურული მოდულური ვერტიკალური ფერმა გახსნა.
კომპანიის ინფორმაციით, ახალი სისტემა მცენარეების მოყვანის გარემოს სრულად აკონტროლებს და კლიმატური პირობებისგან სრულიად დამოუკიდებელია.
საპილოტე საწარმო ტოკიოს კოტოს რაიონში მდებარეობს და ერთმანეთზე განთავსებული, ჰერმეტულად დახურული მოდულებისგან შედგება. თითოეულ მოდულში დამოუკიდებლად რეგულირდება ტემპერატურა, ტენიანობა, ჰაერის შემადგენლობა, განათება, წყლის ტემპერატურა და სხვა პარამეტრები, რაც კულტურებისთვის ოპტიმალურ გარემოს ქმნის.
კომპანიის განცხადებით, ტექნოლოგია საშუალებას იძლევა მცენარეები მთელი წლის განმავლობაში სტაბილური ხარისხითა და მოსავლიანობით გაიზარდოს, მიუხედავად გვალვის, სიცხის, ყინვისა თუ სხვა კლიმატური ფაქტორებისა. ამასთან, დახურული სისტემა ამცირებს მავნებლებისა და დაავადებების გავრცელების რისკსაც, რის გამოც მცენარეთა დაცვის საშუალებების გამოყენების საჭიროება მნიშვნელოვნად მცირდება.
გახსნის ცერემონიაზე იაპონიის სოფლის მეურნეობის მინისტრმა ნორიკაძუ სუძუკიმ განაცხადა, რომ მსგავსი ტექნოლოგიები მომავალში სასურსათო უსაფრთხოების უზრუნველყოფისთვის მნიშვნელოვან როლს შეასრულებს. მისი თქმით, კლიმატის ცვლილების პირობებში კონტროლირებადი გარემოს მქონე ფერმები სოფლის მეურნეობის განვითარების ერთ-ერთი პერსპექტიული მიმართულებაა.
PlantX გეგმავს ტექნოლოგიის კომერციულ განვითარებას როგორც იაპონიაში, ისე საერთაშორისო ბაზრებზე. კომპანია მიიჩნევს, რომ სრულად დახურული ვერტიკალური ფერმები განსაკუთრებით მოთხოვნადი გახდება იმ ქვეყნებში, სადაც სასოფლო-სამეურნეო მიწების რესურსი შეზღუდულია ან კლიმატური პირობები ღია გრუნტში სტაბილურ წარმოებას ართულებს.
ილუსტრაცია: ChatGPT (AI) / აგროკავკასია
წყარო: Japan Times
