უკრაინამ ესპანეთიდან მეცხოველეობის პროდუქტების იმპორტზე შეზღუდვები დააწესა, მსხვილფეხა რქოსანი პირუტყვის ნოდულარული (კვანძოვანი) დერმატიტის რეგისტრირებული შემთხვევის გამო.
ამის შესახებ ინფორმაციას სურსათის უვნებლობისა და მომხმარებელთა დაცვის სახელმწიფო სამსახურის, აღმოსავლეთ რეგიონთაშორისი დეპარტამენტი ავრცელებს, რომელიც მთავარი სახელმწიფო ვეტერინარული ინსპექტორის 2025 წლის 8 ოქტომბრით დათარიღებულ ბრძანებას ეყრდნობა.
სააგენტომ საფუძვლად, ევროკავშირის (ცხოველთა დაავადებათა შეტყობინების საინფორმაციო სისტემის (ADIS) მეშვეობით) და ცხოველთა ჯანმრთელობის მსოფლიო ორგანიზაციის (WOAH) ოფიციალური ინფორმაცია მოიყვანა.
„ესპანეთის სამეფოდან უკრაინაში აკრძალულია კვანძოვანი კანის დაავადებისადმი მგრძნობიარე ცხოველების, მათი რეპროდუქციული მასალის, მგრძნობიარე სახეობების ახალი და გაცივებული კანის, ნედლი რძის და ადამიანის მოხმარებისთვის განკუთვნილი რძის პროდუქტების იმპორტი“, – ნათქვამია განცხადებაში.
ამ შეზღუდვის გამონაკლისს წარმოადგენს პროდუქტები, რომლებიც დამუშავებულია ისეთი მეთოდით, რომელიც მითითებული დაავადების პათოგენის განადგურების გარანტიას იძლევა.
* ნოდულარული (კვანძოვანი) დერმატიტი ვირუსული დაავადებაა, ხასიათდება ცხელებით, ლიმფური სისტემების დაზიანებით, შინაგანი ორგანოებისა და კანქვეშა უჯრედების შეშუპებით, ნეკროზით. ყალიბდება კანქვეშა კვანძები (ბორცვები), საქონელს უზიანდება თვალი, სასუნთქი და საჭმლის მომნელებელი სისტემის ლორწოვანი გარსი.
