მოლდოვას დედაქალაქ კიშინიოვში ფერმერებისთვის GreenFields აკადემია გაიხსნა.
მოლდოველი ფერმერებისთვის განკუთვნილმა საგანმანათლებლო ინიციატივამ, GreenFields Moldova აკადემია, რომელიც მიზნად ისახავს სოფლის მეურნეობის კლიმატის ცვლილებასთან ადაპტაციას და მდგრადი სასოფლო-სამეურნეო პრაქტიკის ხელშეწყობას, 29 ოქტომბერს დაიწყო მუშაობა.
პროგრამა შექმნილია ფერმერებისთვის, რომლებიც აწარმოებენ საველე კულტურებს და ფლობენ მინიმუმ 50 ჰექტარ მიწას. მონაწილეებს უნდა ჰქონდეთ მინიმუმ სამწლიანი გამოცდილება სოფლის მეურნეობაში და გამოავლინონ მზადყოფნა, კურსის განმავლობაში მიღებული ცოდნა და პრაქტიკული უნარები მინიმუმ 5 ჰექტარ ნაკვეთზე გამოიყენონ, განმარტავს moldpres.
„ჩვენი ფერმერები კლიმატის ცვლილებით გამოწვეული სერიოზული გამოწვევების წინაშე დგანან. მდგრადი სოფლის მეურნეობა სოფლის მეურნეობისა და კვების მრეწველობის სამინისტროს პრიორიტეტია და ყველა დაინტერესებული მხარის მონაწილეობა აუცილებელია სექტორის სტაბილურობის უზრუნველსაყოფად. ეს ინიციატივა, რომელიც ინვესტიციებსა და პროფესიულ მომზადებას აერთიანებს, ქებას იმსახურებს“, – განაცხადა სოფლის მეურნეობისა და კვების მრეწველობის სამინისტროს გენერალურმა მდივანმა, სერგიუ გერჩიუმ.
GreenFields Moldova აკადემია 30-ზე მეტ ფერმერს ცხრა თვის განმავლობაში სტრუქტურირებულ ტრენინგს შესთავაზებს, რომელიც ექვსი მოდულისა და ორი თემატური ფერმის ვიზიტისგან შედგება.
პროგრამა რუმინეთში დანერგილი წარმატებული მოდელის მიხედვით ხორციელდება და ხაზს უსვამს პრაქტიკულ ტრენინგსა და მდგრადი სოფლის მეურნეობის პრინციპებს, რათა ფერმერებს რესურსების ეფექტური მართვისა და ახალ კლიმატურ რეალობებთან ადაპტაციის მხარდაჭერაში დაეხმაროს.
