კლიმატის ცვლილებასთან ადაპტაციისა და სოფლის მეურნეობის მოდერნიზაციის მიზნით უზბეკეთის მთავრობამ ახალი საინვესტიციო გზამკვლევი ოფიციალურად დაამტკიცა.
დოკუმენტი, რომელიც FAO-ს საინვესტიციო ცენტრისა და ევროპის რეკონსტრუქციისა და განვითარების ბანკის (EBRD) მხარდაჭერით მომზადდა, ქვეყანაში კლიმატგონივრული აგროსასურსათო სისტემების განვითარების კონკრეტულ საინვესტიციო პროექტებს განსაზღვრავს.
გზამკვლევი დაახლოებით 1,3 მილიარდი ევროს მოცულობის პრიორიტეტულ ინვესტიციებს მოიცავს, რომლებიც 2030 წლამდე უნდა განხორციელდეს. პროგრამის ძირითადი მიმართულებებია თანამედროვე სარწყავი სისტემების განვითარება, წყლის რესურსების უფრო ეფექტიანი გამოყენება, კულტურების დივერსიფიკაცია, დაბალემისიური სათბურების დანერგვა, სასუქების ოპტიმიზებული გამოყენება და მეცხოველეობაში მეთანის ემისიების შემცირება.
FAO-ს შეფასებით, დაგეგმილი ინვესტიციები ყოველწლიურად დაახლოებით 1 მილიონი ტონა CO₂-ის ეკვივალენტი სათბურის აირების შემცირებას, სასოფლო-სამეურნეო წარმოების 250 მილიონი ევროთი ზრდასა და წყლის გამოყენების ეფექტიანობის 40%-მდე გაუმჯობესებას უზრუნველყოფს. პროექტები 340 ათას ჰექტარზე მეტ ბამბისა და ხორბლის ფართობს, ასევე 900-ზე მეტ სათბურს მოიცავს.
უზბეკეთის სოფლის მეურნეობა ქვეყნის ეკონომიკის ერთ-ერთი მთავარი სექტორია, თუმცა ის კლიმატის ცვლილების ზემოქმედებასაც ყველაზე მეტად განიცდის. ტემპერატურის მატება, წყლის დეფიციტი და ნიადაგის დეგრადაცია უკვე მნიშვნელოვნად აისახება მოსავლიანობასა და ფერმერთა შემოსავლებზე. ახალი გზამკვლევის მიზანია კლიმატური ვალდებულებების პრაქტიკულ საინვესტიციო პროექტებად გარდაქმნა და საჯარო თუ კერძო კაპიტალის მოზიდვა.
დოკუმენტის დამტკიცება ასევე ითვალისწინებს ANORA-ს (Agrifood Investment Opportunities for Resilient Agriculture) პლატფორმის შექმნას, რომლის მეშვეობითაც სახელმწიფო, საერთაშორისო საფინანსო ინსტიტუტები და კერძო სექტორი კლიმატგონივრულ სოფლის მეურნეობაში ინვესტიციებს ერთობლივად განახორციელებენ. FAO-ს შეფასებით, ეს უზბეკეთისთვის მნიშვნელოვანი ნაბიჯია უფრო კონკურენტუნარიანი, მდგრადი და თანამედროვე აგროსასურსათო სისტემის ჩამოყალიბების მიმართულებით.
წყარო: FAO
