ყაზახეთის ქალაქ აქტაუში კიდევ ერთი საზღვაო პორტის მშენებლობა იგეგმება, როგორც მანგისტაუს რეგიონში სატრანსპორტო ინფრასტრუქტურის განვითარებისა და სატრანზიტო შესაძლებლობების გაძლიერების პროგრამის ნაწილი.
მანგისტაუს რეგიონის აკიმის ნურდაულეტ კილიბაის თქმით, საინვესტიციო პროექტი 300 მილიონ დოლარად არის შეფასებული და სტრატეგიული პარტნიორია ჩინური Zhongyong International Group. ინვესტორი ამჟამად საინვესტიციო ხელშეკრულების დოკუმენტებს ამზადებს.
„პროექტი ხელს შეუწყობს ახალი საერთაშორისო სატრანსპორტო დერეფნის ფორმირებას: ჩინეთი-ყაზახეთი-აქტაუ-ბაქო-ფოთი-ევროპა. მისი განხორციელება ტვირთის მიწოდების დროს 7-15 დღით, ტრანსპორტირების ხარჯებს კი 18-25%-ით შეამცირებს და ახალ სამუშაო ადგილებს შექმნის“, – ხაზგასმით აღნიშნა ნურდაულეტ კილიბაიმ.
ElDala.kz-ის ცნობით, ვაჭრობისა და ინტეგრაციის მინისტრმა არმან შაკკალიევმა განაცხადა, რომ Caspian Hub-ის განვითარების ფარგლებში ორი პროექტი ხორციელდება: აქტაუს საზღვაო პორტში კონტეინერების ჰაბის და კურიკის პორტში სარჟას მრავალფუნქციური საზღვაო ტერმინალის მშენებლობა.
ჰაბის კონტეინერების გადამუშავების საპროექტო სიმძლავრე 240 000 TEU იქნება. ლიანიუნგანგის პორტთან 47.6 მილიარდი ტენგეს (92 197 392 $) ინვესტიციის მოზიდვის ხელშეკრულება გაფორმდა. კონტეინერების ჰაბის პირველი ფაზა მიმდინარე წლის ივლისში დაიწყო. მეორე ფაზის მშენებლობა წლის ბოლომდე დასრულდება.
სარჟას საზღვაო ტერმინალი შენდება Semurg Invest-ის კერძო ინვესტიციით, რომლის ჯამური ღირებულება 98 მილიარდი ტენგეა (189 818 160 $).
ექსპლუატაციაში უკვე შევიდა ზოგადი ტვირთების ტერმინალი და დროებითი შენახვის ობიექტი, მიმდინარეობს ტვირთების გადამუშავება. გრძელდება მარცვლეულის ტერმინალის, ზოგადი ტვირთების ტერმინალის, თხევადი ნაყარი ტვირთების ტერმინალის, ქიმიური ტერმინალის და სატრანსპორტო და ლოჯისტიკური ცენტრის მშენებლობა.
