მსოფლიოს საუკეთესო სომელიეს კონკურსის ფინალში ქართველიც მონაწილეობს

170 Views

დღეს, 15 მარტს ბელგიაში, ქალაქ ანტვერპენში, საერთაშორისო სომელიეთა ასოციაციის (ASI) ეგიდით იმართება კონკურსის – „მსოფლიოს საუკეთესო სომელიე 2019“- ფინალი.

ჩვენი ქვეყნის ისტორიაში პირველად, ამ მაღალი რანგის კონკურსზე საქართველოს სახელით იასპარეზებს „საქართველოს საუკეთესო სომელიე 2018“-ის ტიტულის მფლობელი, თამაზ თამაზაშვილი.

შალვა ხეცურიანი (საქართველოს სომელიეთა ასოციაციის პრეზიდენტი და „მარანი ხეცურიანი“-ს დამფუძნებელი): „ძალიან მიხარია, რომ საქართველო წარმოდგენილი იქნება კონკურსზე.

2018 წლის ივნისში საქართველოს სომელიეთა ასოციაციამ, ღვინის ეროვნულ სააგენტოსთან ერთად, საერთაშორისო სომელიეთა ასოციაციის (ASI) 49-ე გენერალურ ასამბლეას თბილისში უმასპინძლა, რომლის ფარგლებში საშუალება გვქონდა, რომ მსოფლიოს ყველაზე მნიშვნელოვანი სომელიეებისთვის, ევროპისა და მსოფლიო ჩემპიონებისთვის გაგვეცნო ქართული ღვინო, ჩვენი ქვეყნის კულტურა, ტრადიციები, ისტორია, წეს-ჩვეულებები.

ჩატარდა საქართველოს საუკეთსო ქვევრის ღვინოების დეგუსტაცია, საფერავის ძირითადი ორგანოლეპტიკური მახასიათებლების (მარკერების) დადგენის საერთაშორისო სესია, ნანა ჯორჯაძის ფილმის „ღვინის ნულოვანი მერიდიანი“-ს ეროვნული პრემიერა. ასე რომ, სომელიეთა მსოფლიო კონკურსზე უკვე კარგად ნაცნობ ქვეყნად წარვსდგებით“

კონკურსი „მსოფლიოს საუკეთესო სომელიე“,საერთაშორისო სომელიეთა ასოციაციის (ASI) მიერ, 1969 წელსდაარსდა და სამ წელიწადში ერთხელ ტარდება. წელს კონკურსის არსებობიდან საიუბილეო 50-ე წელია და სიმბოლურია, რომ სწორედ იმ ქალაქში, ანტვერპენში, გაიმართება, სადაც პირველად ჩატარდა.

კონკურსის ქართველი მონაწილე თამაზ თამაზაშვილი საქართველოს სომელიეთა ასოციაციის მიერ აკრედიტებული სომელიე, თბილისის ღვინის სკოლისა და WSET-ის კურსდამთავრებულია.

მან გასულ წელს, სხვა აკრედიტებულ სომელიებთან ერთად, მონაწილეობა მიიღო საქართველოს სომელიეთა ასოციაციის ორგანიზებით და სოფლის მეურნეობის სამინისტროს ღვინის ეროვნული სააგენტოს მხარდაჭერით  გამართულ კონკურსში „საქართველოს საუკეთესო სომელიე 2018“ და მთავარი პრიზის მფლობელი გახდა.

კონკურსის, „საქართველოს საუკეთესო სომელიე 2018“-ის  მხარდამჭერები იყვნენ: საქართველოს სოფლის მეურნეობის სამინისტრო, ღვინის ეროვნული სააგენტო, თბილისის ღვინის სკოლა, ავსტრიული კომპანია „რიდელი“, „რედისონ ბლუ ივერია ჰოტელ თბილისი“, „ღონისძიებების სივრცე-რესპუბლიკა“, „წინანდლის მამული“, „გდ ალკო“, „ბადაგონი“, „თბილღვინო“, „თელავის ღვინის მარანი“, „ბატონო“, „შატო მერე“, „ვინივერია“, „ძმები ასკანელი“, „თელიანი ველი“, „მეღვინეობა ბესინი“, „შუმი“, „შატო ზეგაანი“, „კახეთის ღვინოები“, კვების დაწესებულებების ბიზნეს განვითარების სააგენტო „გასტრონავტი“ და „მარანი ხეცურიანი“.

2018 წლის საქართველოს საუკეთესო სომელიე თამაზ თამაზაშვილი და საქართველოს სომელიეთა ასოციაციის პრეზიდენტი შალვა ხეცურიანი უკვე გაემგზავრნენ ბელგიაში, ქალაქ ანტვერპენში, სადაც 2019 წლის 15 მარტს იმართება კონკურსის – „მსოფლიოს საუკეთესო სომელიე 2019“- ფინალი.

ამ კონკურსში ყოველთვის მსოფლიოს მრავალი ქვეყნის სომელიეები მონაწილეობენ.წინა კონკურსში შვედმა სომელიემ,არვიდ როზენგრენმა გაიმარჯვა. ბოლო მონაცემებით, წლევანდელ კონკურსში გამარჯვების მოპოვებას 66 ქვეყნის წარმომადგენელი შეეცდება, მათ შორის – ქართველი სომელიე, თამაზ თამაზაშვილიც იქნება.

Related Articles

კარტლისი – აგროტექნოლოგიები
სტარტაპერი
ბიოაგრო
ორგანული, ბიო, აგრო
თქვენი რეკლამა
Georgian Dairy
აგრარული საქართველო
აგრარული, საქართველო
აგროკავკასია FB