ევროკომისიას სურს 2040 წლისთვის ევროპაში სათბურის გაზების ემისიები 1990 წელთან შედარებით 90 პროცენტით შეამციროს. ძირითადი სიმძიმე მრეწველობაზე, ტრანსპორტსა და სოფლის მეურნეობაზე მოვა.
კლიმატის პოლიტიკის ეს მიზანი არის დიალოგის დაწყება და არა გამოსავალი, განაცხადა კლიმატთან დაკავშირებული მოქმედებების საკითხებში ევროკომისარმა ვოპკე ჰოექსტრამ სტრასბურგში გამართულ პრეზენტაციაზე.
ევროპარლამენტის არჩევნების შემდეგ, რომელიც 2024 წლის ივნისში გაიმართება, ევროკომისიის ახალმა შემადგენლობამ შესაბამისი საკანონმდებლო წინადადება უნდა წარადგინოს, ხაზგასმით აღნიშნა ევროკომისარმა. კომისიის რეკომენდაცია სავალდებულო არ არის, გვახსენებს სააგენტო EPD.
სექტორები, რომლებმაც უნდა შეამცირონ სათბურის გაზების ემისიები, მოიცავს მრეწველობას, ტრანსპორტს და სოფლის მეურნეობას, აღნიშნავს სააგენტო dpa. წინადადება ასევე მოითხოვს განახლებადი ენერგიის გამოყენების გაფართოებას და ნახშირბადის შენახვის (CCS) ტექნოლოგიების ხელშეწყობას. ეს კეთდება იმისთვის, რომ CO2 არ შევიდეს ატმოსფეროში და შეანელოს გლობალური დათბობა.
2021 წელს ევროკავშირმა დააკანონა მიზანი, რომ ევროპის ეკონომიკა და საზოგადოება კლიმატურად ნეიტრალური იყოს 2050 წლისთვის. ევროკავშირის კლიმატის კანონმა ასევე დაადგინა პირველი შუალედური მიზანი სათბურის გაზების ემისიების მინიმუმ 55 პროცენტით შემცირების შესახებ 2030 წლისთვის 1990 წელთან შედარებით. Fit for 55 საკანონმდებლო პაკეტი შექმნილია ამ მიზნის მიღწევის უზრუნველსაყოფად.
2040 წლისთვის ემისიების 90 პროცენტით შემცირება შეესაბამება ევროკავშირის ვალდებულებებს პარიზის კლიმატის შეთანხმებით და კლიმატის ცვლილების შესახებ ევროკავშირის სამეცნიერო მრჩეველთა საბჭოს რეკომენდაციებთან. ამ უკანასკნელმა 2023 წლის ივნისში რეკომენდაცია გაუწია, რომ ევროკავშირმა 2040 წლისთვის სათბურის გაზების ემისიები 90-95 პროცენტით შეამციროს. 2015 წლის პარიზის კლიმატის შეთანხმება მიზნად ისახავს გლობალური დათბობის შეზღუდვას 1,5 გრადუს ცელსიუსამდე წინა ინდუსტრიულ პერიოდთან შედარებით.
წყარო: dw
