ევროკომისიის კვლევის მიხედვით, პესტიციდების ნარჩენების მიმართ უფრო მკაცრმა მოთხოვნებმა შესაძლოა ევროკავშირში სასოფლო-სამეურნეო პროდუქციის იმპორტი მნიშვნელოვნად შეამციროს.
აშშ-ის სოფლის მეურნეობის დეპარტამენტის (USDA) საგარეო სასოფლო-სამეურნეო სამსახურის მიერ გამოქვეყნებული ანგარიშის თანახმად, ევროკავშირში განსახილველმა Food and Feed Omnibus ინიციატივამ შესაძლოა აგროსასურსათო პროდუქციის იმპორტზე მნიშვნელოვანი გავლენა მოახდინოს. ევროკომისიის ერთობლივი კვლევითი ცენტრის (JRC) შეფასებით, ყველაზე მკაცრი სცენარის შემთხვევაში ევროკავშირის სოფლის მეურნეობის პროდუქციის იმპორტი 41%-მდე შეიძლება შემცირდეს.
კვლევა ეხება ევროკავშირის მიერ აკრძალული ზოგიერთი პესტიციდის ნარჩენების მაქსიმალური დასაშვები დონის (MRL) მკვეთრ შემცირებას იმპორტირებულ საკვებსა და ცხოველის საკვებში. საუბარია 18 აქტიურ ნივთიერებაზე, რომლებიც ევროკავშირში აღარ არის დამტკიცებული, თუმცა მსოფლიოს მრავალ ქვეყანაში კვლავ გამოიყენება. ცვლილებები 235 სასოფლო-სამეურნეო პროდუქტსა და 86 ექსპორტიორ ქვეყანას შეეხება.
JRC-მ სამი შესაძლო სცენარი შეაფასა. ყველაზე მკაცრი ვარიანტი იმ შემთხვევას განიხილავს, თუ ექსპორტიორი ქვეყნები ახალ მოთხოვნებთან ადაპტირებას ვერ შეძლებენ. ამ შემთხვევაში ევროკავშირში აგროსასურსათო იმპორტის მოცულობა 41%-ით შემცირდება, რაც განსაკუთრებით იმ პროდუქტებს დააზარალებს, რომელთა წარმოება ევროკავშირის გარეთ ხდება.
ანალიტიკოსები აღნიშნავენ, რომ რეგულაციების გამკაცრება მხოლოდ საერთაშორისო ვაჭრობაზე არ აისახება. იმპორტის შემცირებამ შესაძლოა ევროკავშირის შიდა ბაზარზე გარკვეული პროდუქციის ფასების ზრდა და მიწოდების ჯაჭვების გადალაგება გამოიწვიოს. ამავდროულად, ევროკავშირი ცდილობს სურსათის უსაფრთხოების, გარემოს დაცვისა და მომხმარებელთა ჯანმრთელობის სტანდარტების კიდევ უფრო გამკაცრებას.
ევროკავშირი განსაკუთრებით დამოკიდებულია ცილოვანი საკვების, ზეთოვანი კულტურებისა და ზოგიერთი სასოფლო-სამეურნეო ნედლეულის იმპორტზე. შესაბამისად, ნებისმიერი ცვლილება, რომელიც საერთაშორისო მომწოდებლების ნაწილს ევროპული ბაზრიდან გამოთიშავს, შესაძლოა გლობალურ სავაჭრო ნაკადებზეც აისახოს.
მიუხედავად იმისა, რომ კვლევა მხოლოდ შესაძლო სცენარებს განიხილავს და საბოლოო გადაწყვეტილება ჯერ მიღებული არ არის, ანგარიში უკვე იწვევს დისკუსიას როგორც ექსპორტიორ ქვეყნებში, ისე ევროკავშირის აგროსასურსათო სექტორში.
ფოტო: აგროაკვასია / AI
წყარო: USDA Foreign Agricultural Service
