ყაზახეთი ჩინურ კომპანიასთან — Inner Mongolia Muland Agricultural Technology Co., Ltd. ერთად გეგმავს თანამედროვე ბიოტექნოლოგიური ცენტრის გახსნას უვირუსო სათესლე კარტოფილის წარმოებისთვის, იტყობინება ElDala.kz.
შესაბამისი მოლაპარაკებები გაიმართა ყაზახეთის რესპუბლიკის სოფლის მეურნეობის მინისტრ აიდარბეკ საპაროვსა და კომპანიის აღმასრულებელ დირექტორ ვეი ძინგლონგს შორის.
ჩინურმა მხარემ შესთავაზა ლაბორატორიული და სათბურის კომპლექსის შექმნა მოწინავე აგრობიოტექნოლოგიების გამოყენებით, მათ შორის მიკრო და ულტრამიკროტუბერების წარმოების ტექნოლოგიებით. კომპანიას აქვს საკუთარი კვლევითი ბაზა და მსგავსი პროექტები უკვე განხორციელებული აქვს სხვა ქვეყნებშიც.
პროექტი მიზნად ისახავს მაღალი ხარისხის სარგავი მასალის სამრეწველო წარმოების განვითარებას და ცენტრალური აზიის ბაზრებზე ექსპორტის პოტენციალის გაძლიერებას.
მინისტრმა ხაზი გაუსვა დარგის სტრატეგიულ მნიშვნელობას: 2025 წლის ბოლოსთვის კარტოფილის ნათესმა ფართობმა 131 000 ჰექტარს მიაღწია, საშუალო მოსავლიანობა — ჰექტარზე 220 ცენტნერია, ხოლო მთლიანი წარმოება — 2.8 მილიონ ტონა.
საპაროვის თქმით, ადგილობრივი თესლის წარმოების სისტემის განვითარება აგროსამრეწველო კომპლექსისთვის პრიორიტეტულია. მისი შეფასებით, ბიოტექნოლოგიის განვითარება და უვირუსო სარგავი მასალის წარმოების გაფართოება მნიშვნელოვნად შეამცირებს იმპორტზე დამოკიდებულებას, გაზრდის მოსავლიანობას და გააძლიერებს ადგილობრივი სელექციონერების კონკურენტუნარიანობას.
დღეს რესპუბლიკაში 22 სპეციალიზებული მეურნეობაა დაკავებული ორიგინალური და ელიტური თესლის წარმოებით. ბიოტექნოლოგიური ლაბორატორიები მნიშვნელოვან როლს ასრულებენ ინდუსტრიაში, ხოლო წამყვან სამეცნიერო ორგანიზაციად რჩება ყაზახეთის ხილისა და ბოსტნეულის კვლევითი ინსტიტუტი (NASEC), რომელმაც უკვე დანერგა უვირუსო გამრავლებისა და სამრეწველო კარტოფილის წარმოების ტექნოლოგიები.
კარტოფილის მოყვანის ტექნოლოგია და რამდენიმე ჯიში
