![mukhuris_baza_moswavleebi_526267277181819191727828198928_272788228101018199028929010202 მუხურის, მეფუტკრეობის, ბაზა](https://agrokavkaz.ge/wp-content/uploads/2024/07/mukhuris_baza_moswavleebi_526267277181819191727828198928_272788228101018199028929010202.jpg)
ჩხოროწყუს მუნიციპალიტეტის ლესიჭინეს პირველი საჯარო სკოლის მოსწავლეები, პედაგოგებთან ერთად, სოფლის მეურნეობის სამეცნიერო კვლევითი ცენტრის მუხურის მეფუტკრეობის საცდელ ბაზას ეწვივნენ.
ვიზიტის მიზანს მეფუტკრეობის კომპლექსის დათვალიერება და მიმდინარე კვლევების გაცნობა წარმოადგენდა.
მოსწავლეები გაზაფხულზე ფუტკრის მდგომარეობის შეფასების მეთოდებს, დაავადების გამოვლენის კლინიკურ ნიშნებს, მკურნალობისათვის საჭირო პრეპარატების შერჩევასა და მათი გამოყენების წესებს, ასევე, ადრე უდედო ოჯახის გამოვლენის და მისი გამოსწორების მეთოდებს გაეცნენ.
ვიზიტის ფარგლებში, მოსწავლეებმა მორფოლოგიური და ექსტერიერული კვლევის ლაბორატორიაც დაათვალიერეს. სტუმრებს ლაბორატორიის სპეციფიკაზე, მუშაობის პრინციპებზე, მიმდინარე და დასრულებული კვლევის შედეგებზე ლაბორატორიის წარმომადგენელი ლალი ჩიქოვანი ესაუბრა.
მოსწავლეებმა, თეორიული ცოდნის გარდა, მცირე პრაქტიკული გამოცდილება მიიღეს პრეპარატების დამზადებისა და ჯიშურობის განმსაზღვრელი ექსტერიერული ნიშნების პროცესში.
ვიზიტის დასასრულს სტუმრებმა მუხურის მეფუტკრეობის ბაზის თაფლი დააგემოვნეს.
აღსანიშნავია, რომ სსიპ სოფლის მეურნეობის სამეცნიერო კვლევითი ცენტრის მუხურის მეფუტკრეობის ბაზა, დაარსების 2017 წლიდან, საქართველოს მასშტაბით, აქტიურად მონაწილეობს მეფუტკრე-ფერმერების გადამზადება-სწავლების, ახალგაზრდა კადრების მოზიდვის, მომზადების და აგრარულ სფეროში მათი ჩართვის მიზნით რეგულარული უფასო ტრენინგების მოწყობაში.